ശസ്ത്രക്രിയയ്ക്കു പിന്നാലെ ആരോഗ്യനിലയിൽ പുരോഗതി; ആശുപത്രിയിൽ കുർബാന നടത്തി മാർപ്പാപ്പ

വത്തിക്കാൻ: ചികിത്സയിൽ കഴിയുന്ന ലിയോ പതിനാലാമൻ മാർപ്പാപ്പയുടെ ആരോഗ്യനിലയിൽ പുരോഗതിയെന്ന് ആശുപത്രി അധികൃതർ. ശസ്ത്രക്രിയയ്ക്ക് പിന്നാലെ വേഗത്തിൽ സുഖം പ്രാപിച്ചുവരുന്ന മാർപ്പാപ്പയുടെ വെള്ളിയാഴ്ചത്തെ രക്തപരിശോധനാ ഫലങ്ങളും നെഞ്ചിന്റെ എക്‌സ്‌റേയും ആരോഗ്യനില മെച്ചപ്പെടുന്നതായാണ് സൂചിപ്പിക്കുന്നതെന്ന് അധികൃതർ അറിയിച്ചു.

ജെമിലി ആശുപത്രിയിൽ പ്രവേശിപ്പിക്കപ്പെട്ടതിന്റെ നാലാം ദിവസം, തന്നെ പരിചരിക്കുന്ന ഡോക്ടർമാർക്കും നഴ്‌സുമാർക്കും മറ്റ് ആരോഗ്യപ്രവർത്തകർക്കുമായി മാർപ്പാപ്പ കുർബാന അർപ്പിച്ചു. ആശുപത്രിയുടെ പത്താം നിലയിൽ ഒരുക്കിയ പ്രത്യേക മുറിയിലായിരുന്നു ചടങ്ങ്.

ശ്വാസകോശത്തിലെ മുഴ നീക്കം ചെയ്യുന്നതിനായി നടത്തിയ ശസ്ത്രക്രിയയ്ക്കിടെയാണ് മാർപ്പാപ്പയ്ക്ക് ലങ് അഡിനോകാർസിനോമ എന്ന കാൻസർ സ്ഥിരീകരിച്ചത്. തുടർന്ന് ചൊവ്വാഴ്ച നടത്തിയ 90 മിനിറ്റ് നീണ്ട ശസ്ത്രക്രിയയിൽ വലത് ശ്വാസകോശത്തിന്റെ താഴത്തെ ലോബ് നീക്കം ചെയ്തു.

ചികിത്സയും വിശ്രമവും തുടരുന്ന സാഹചര്യത്തിൽ ഒക്ടോബർ 20 വരെ മാർപ്പാപ്പയുടെ പൊതുപരിപാടികളും കൂടിക്കാഴ്ചകളും റദ്ദാക്കിയിട്ടുണ്ട്. തുടർചികിത്സയ്ക്കൊപ്പം ആരോഗ്യനില നിരീക്ഷിച്ചുവരികയാണെന്നും ആശുപത്രി അധികൃതർ വ്യക്തമാക്കി.