'കേന്ദ്രത്തിന് മുന്നിൽ സർക്കാർ വഴങ്ങുന്നു', സർവകലാശാല വിഷയത്തിൽ യുഡിഎഫിനെതിരെ പിണറായി വിജയൻ

തിരുവനന്തപുരം: സംസ്ഥാനത്തെ സർവകലാശാലകളുടെ സ്വയംഭരണാവകാശം സംരക്ഷിക്കാൻ എൽഡിഎഫ് സർക്കാർ നിയമപരമായും ഭരണപരമായും ശക്തമായ നിലപാട് സ്വീകരിച്ചിരുന്നുവെന്ന് പ്രതിപക്ഷ നേതാവ് പിണറായി വിജയൻ. എന്നാൽ നിലവിലെ യുഡിഎഫ് സർക്കാർ ആ നിലപാട് ഉപേക്ഷിച്ച് കേന്ദ്രത്തിന്റെ സമ്മർദങ്ങൾക്ക് വഴങ്ങുകയാണെന്ന് അദ്ദേഹം ആരോപിച്ചു.

വൈസ് ചാൻസലർ നിയമനങ്ങൾ ഉൾപ്പെടെയുള്ള വിഷയങ്ങളിൽ എൽഡിഎഫ് ഭരണകാലത്ത് പലതവണ കോടതിയെ സമീപിച്ച് സർവകലാശാലകളുടെ സ്വാതന്ത്ര്യം സംരക്ഷിക്കാൻ ശ്രമിച്ചിരുന്നുവെന്ന് പിണറായി പറഞ്ഞു. എന്നാൽ യുഡിഎഫ് അധികാരത്തിലെത്തിയതിന് ശേഷം സർവകലാശാലകളിലെ ഇടപെടലുകൾക്കെതിരെ കാര്യമായ പ്രതിരോധം ഉയരുന്നില്ലെന്നും അദ്ദേഹം വിമർശിച്ചു.

സംഘപരിവാർ അജണ്ടകൾക്ക് അനുകൂലമായ നിലപാടാണ് സംസ്ഥാന സർക്കാർ സ്വീകരിക്കുന്നതെന്നും യുഡിഎഫ് ഭരണത്തിന് അതിനെതിരെ വ്യക്തമായ എതിർപ്പ് പ്രകടിപ്പിക്കാൻ കഴിയുന്നില്ലെന്നും പിണറായി ആരോപിച്ചു. ഈ സമീപനം സംസ്ഥാനത്തെ ഉന്നത വിദ്യാഭ്യാസ മേഖലയെ പ്രതികൂലമായി ബാധിക്കുമെന്ന ആശങ്കയും അദ്ദേഹം പങ്കുവച്ചു.

പി.എം. ശ്രീ പദ്ധതിയുമായി ബന്ധപ്പെട്ടും സർക്കാരിനെതിരെ അദ്ദേഹം വിമർശനം ഉന്നയിച്ചു. പദ്ധതി നടപ്പാക്കാൻ സംസ്ഥാനം തീരുമാനിച്ചതായി സർക്കാർ വ്യക്തമാക്കിയിട്ടുണ്ടെങ്കിലും, കേരളം ഇതുവരെ പദ്ധതിയുടെ ഭാഗമായിട്ടില്ലെന്നും ഒരു രൂപ പോലും കേന്ദ്രസഹായം ലഭിച്ചിട്ടില്ലെന്നും കേന്ദ്ര സർക്കാർ തന്നെ വ്യക്തമാക്കിയ സാഹചര്യത്തിൽ മുഖ്യമന്ത്രിയുടെ വിശദീകരണം വസ്തുതകളോട് പൊരുത്തപ്പെടുന്നതല്ലെന്ന് അദ്ദേഹം പറഞ്ഞു.

അധികാരത്തിലെത്തുന്നതിന് മുമ്പ് പി.എം. ശ്രീ പദ്ധതിക്കെതിരെ ശക്തമായി നിലകൊണ്ടവർ ഇപ്പോൾ അതേ പദ്ധതിയുമായി മുന്നോട്ട് പോകാൻ തയ്യാറാകുന്നത് ജനങ്ങളോടുള്ള വാഗ്ദാന ലംഘനമാണെന്നും പിണറായി ആരോപിച്ചു.

ദേശീയ പരീക്ഷാ ഏജൻസിയായ എൻടിഎയുടെ പ്രവർത്തനത്തെയും അദ്ദേഹം രൂക്ഷമായി വിമർശിച്ചു. പരീക്ഷാ സംവിധാനത്തിലെ വീഴ്ചകൾ രാജ്യത്തെ വിദ്യാർഥികളുടെ ഭാവിയെ അനിശ്ചിതത്വത്തിലാക്കുകയാണെന്നും, പരീക്ഷാ നടത്തിപ്പിൽ സുതാര്യതയും വിശ്വാസ്യതയും ഉറപ്പാക്കാൻ കേന്ദ്ര സർക്കാർ അടിയന്തര നടപടി സ്വീകരിക്കണമെന്നും അദ്ദേഹം ആവശ്യപ്പെട്ടു.