സ്വകാര്യവത്കരണമില്ല, പ്രചാരണം തെറ്റ്; ഔദ്യോഗിക വിശദീകരണവുമായി ബഹിരാകാശ ഏജൻസി

ഡൽഹി: ഐഎസ്ആർഒയെ സ്വകാര്യവത്കരിക്കാൻ കേന്ദ്രസർക്കാർ നീക്കം നടത്തുന്നുവെന്ന തരത്തിലുള്ള പ്രചാരണങ്ങൾ തള്ളി ഇന്ത്യൻ ബഹിരാകാശ ഗവേഷണ സംഘടന. രാജ്യത്തിന്റെ ബഹിരാകാശ മേഖലയിലെ ഐഎസ്ആർഒയുടെ നിർണായക പങ്ക് തുടരുമെന്നും സംഘടന വ്യക്തമാക്കി. വലിയ ബഹിരാകാശ ദൗത്യങ്ങളിൽ കൂടുതൽ ശ്രദ്ധ കേന്ദ്രീകരിക്കുന്നതിനൊപ്പം ഐഎസ്ആർഒയുടെ നേതൃത്വത്തിൽ വിപുലമായ ദേശീയ ബഹിരാകാശ ആവാസവ്യവസ്ഥ രൂപപ്പെടുത്തുകയാണ് ലക്ഷ്യമെന്നും ഔദ്യോഗിക വിശദീകരണത്തിൽ പറയുന്നു.

ബഹിരാകാശ മേഖലയിൽ സ്വകാര്യ സ്ഥാപനങ്ങളുടെ പങ്കാളിത്തം വർധിപ്പിക്കുന്നത് ഐഎസ്ആർഒയുടെ പ്രാധാന്യം കുറയ്ക്കുന്നതിനല്ലെന്നും വിശദീകരണത്തിൽ വ്യക്തമാക്കുന്നു. സർക്കാർ ഇതര സ്ഥാപനങ്ങളുടെ പ്രവർത്തനങ്ങൾ ഏകോപിപ്പിക്കുന്നതിനായി ഇൻസ്പേസ് പ്രവർത്തിക്കും. ഐഎസ്ആർഒ വികസിപ്പിക്കുന്ന സാങ്കേതികവിദ്യകളുടെ വാണിജ്യവത്കരണത്തിന് എൻസിൽ നേതൃത്വം നൽകുമെന്നും സംഘടന വിശദീകരിച്ചു.

പുതിയ ബഹിരാകാശ നയങ്ങൾ രാജ്യത്തെ ബഹിരാകാശ വിപണിക്ക് കൂടുതൽ അവസരങ്ങൾ തുറന്നുനൽകിയതായും ഐഎസ്ആർഒ ചൂണ്ടിക്കാട്ടുന്നു. സ്വകാര്യ നിക്ഷേപവും പങ്കാളിത്തവും വർധിക്കുന്നതോടെ ബഹിരാകാശ മേഖലയെ കൂടുതൽ വിപുലമാക്കുകയാണ് ലക്ഷ്യം. അതേസമയം, ഐഎസ്ആർഒ വലിയ ശാസ്ത്രീയ-ബഹിരാകാശ ദൗത്യങ്ങളിലേക്ക് കൂടുതൽ ശ്രദ്ധ കേന്ദ്രീകരിക്കും.

സ്വന്തം ബഹിരാകാശ നിലയം സ്ഥാപിക്കുന്നതും ചാന്ദ്ര ദൗത്യങ്ങൾ ഉൾപ്പെടെയുള്ള വലിയ പദ്ധതികളും ഐഎസ്ആർഒയുടെ ഭാവി ലക്ഷ്യങ്ങളിൽ ഉൾപ്പെടുന്നതായും ഔദ്യോഗിക വിശദീകരണത്തിൽ പറയുന്നു. രാജ്യത്തിന്റെ ദീർഘകാല ബഹിരാകാശ പദ്ധതികൾക്ക് നേതൃത്വം നൽകുന്ന സ്ഥാപനമായി ഐഎസ്ആർഒ തുടരുമെന്ന സന്ദേശമാണ് ഇതിലൂടെ നൽകുന്നത്.

അതേസമയം, ബഹിരാകാശ മേഖലയിൽ സ്വകാര്യ നിക്ഷേപം വർധിപ്പിക്കാനുള്ള കേന്ദ്രസർക്കാരിന്റെ നടപടികളിൽ ഐഎസ്ആർഒ ജീവനക്കാർക്കിടയിൽ ആശങ്ക ഉയർന്നിരുന്നു. നയപരമായ മാറ്റങ്ങളിൽ ആശങ്ക രേഖപ്പെടുത്തി ജീവനക്കാരുടെ ഒൻപത് സംഘടനകൾ ഐഎസ്ആർഒ ചെയർമാന് കത്തയച്ചിരുന്നു.

ബഹിരാകാശ രംഗത്ത് സ്വകാര്യ പങ്കാളിത്തം അനുവദിച്ചുതുടങ്ങിയതിന് ശേഷമുള്ള ഏറ്റവും ശക്തമായ ജീവനക്കാരുടെ കൂട്ടായ പ്രതികരണമായിരുന്നു ഇത്. വാണിജ്യപരമായ ആവശ്യങ്ങൾക്ക് സ്വകാര്യ സ്ഥാപനങ്ങളുടെ പങ്കാളിത്തം അംഗീകരിക്കാമെങ്കിലും ഐഎസ്ആർഒ പൊതുമേഖലാ സ്ഥാപനമായി തന്നെ നിലനിൽക്കണമെന്ന നിലപാടാണ് ജീവനക്കാരുടെ സംഘടനകൾ കത്തിൽ മുന്നോട്ടുവച്ചത്.

ഈ ആശങ്കകൾക്കിടയിലാണ് ഐഎസ്ആർഒയുടെ ഔദ്യോഗിക വിശദീകരണം പുറത്തുവന്നത്. സ്വകാര്യ മേഖലയ്ക്ക് കൂടുതൽ അവസരം നൽകുന്നതിനൊപ്പം ഐഎസ്ആർഒയുടെ നേതൃത്വവും പ്രധാന ദൗത്യങ്ങളിലെ പങ്കും തുടരുമെന്നാണ് സംഘടന വ്യക്തമാക്കുന്നത്.