പാറളം പഞ്ചായത്ത് ഭരണം യുഡിഎഫിന്; സിപിഐ അംഗങ്ങളായ രണ്ടുപേരെ പുറത്താക്കി

പാറളം: പാറളം ഗ്രാമപഞ്ചായത്തിൽ പ്രസിഡന്റായി കോൺഗ്രസിലെ റോസ് മേരി ആപേഷിനെ തെരഞ്ഞെടുത്തു. പ്രസിഡന്റ്, വൈസ് പ്രസിഡന്റ് തെരഞ്ഞെടുപ്പുകളിൽ ഇടതുമുന്നണിയുടെ തീരുമാനത്തിന് വിരുദ്ധമായി യുഡിഎഫിന് വോട്ട് ചെയ്ത സിപിഐ അംഗങ്ങളായ സി.എം. ഷക്കീറിനെയും വനജ രാജനെയും പാർട്ടിയിൽനിന്ന് പുറത്താക്കി.

പഞ്ചായത്തിൽ ആറു വീതം അംഗങ്ങളുള്ള കോൺഗ്രസും ബിജെപിയും അഞ്ചംഗങ്ങളുള്ള എൽഡിഎഫുമാണ് നിലവിലുള്ളത്. പ്രസിഡന്റ് തെരഞ്ഞെടുപ്പിൽ കോൺഗ്രസിലെ ആറു അംഗങ്ങൾക്കു പുറമെ സിപിഐയിലെ രണ്ടു അംഗങ്ങളും റോസ് മേരി ആപേഷിനെ പിന്തുണച്ചു. ഇതോടെ എൽഡിഎഫിന്റെ ഔദ്യോഗിക നിലപാടിന് വിരുദ്ധമായ വോട്ടുകളാണ് സിപിഐ അംഗങ്ങളിൽനിന്നുണ്ടായത്. ഇതേ നിലപാട് വൈസ് പ്രസിഡന്റ് തെരഞ്ഞെടുപ്പിലും ആവർത്തിച്ചതോടെയാണ് ഇരുവർക്കുമെതിരെ പാർട്ടി നടപടി സ്വീകരിച്ചത്.

നേരത്തെ ബിജെപിയുടെ നേതൃത്വത്തിലായിരുന്നു പഞ്ചായത്തിലെ ഭരണം. യുഡിഎഫും എൽഡിഎഫും ഒരുമിച്ച് ബിജെപിക്കെതിരെ നിലപാടെടുത്തതോടെയാണ് ഭരണത്തിൽ മാറ്റമുണ്ടായത്. കോൺഗ്രസിന് ആറു അംഗങ്ങളും ബിജെപിക്ക് ആറു അംഗങ്ങളും എൽഡിഎഫിന് അഞ്ചു അംഗങ്ങളുമുള്ള പഞ്ചായത്തിൽ സിപിഐ അംഗങ്ങളുടെ പിന്തുണ യുഡിഎഫിന് നിർണായകമായി.

പാർട്ടിയുടെ രാഷ്ട്രീയ നിലപാടിനും മുന്നണി തീരുമാനത്തിനും വിരുദ്ധമായി വോട്ട് ചെയ്തുവെന്ന കാരണത്താലാണ് സി.എം. ഷക്കീറിനെയും വനജ രാജനെയും സിപിഐയിൽനിന്ന് പുറത്താക്കിയത്.