കോക്ക്പിറ്റിലെ ആക്രമണത്തിലും പതറാതെ വിമാനം കാത്ത ഇന്ത്യൻ പൈലറ്റ്; ആരാണ് ക്യാപ്റ്റൻ സ്മിത് മച്ചാർ?

ദുബായിൽ നിന്ന് ടെൽ അവീവിലേക്ക് പറന്ന ഫ്ലൈ ദുബായ് (എഫ്ഇസെഡ്1073) വിമാനത്തിന്റെ കോക്ക്പിറ്റിൽ വെച്ച് ആക്രമണമുണ്ടായിട്ടും, സ്വന്തം ജീവൻ പണയം വെച്ച് വൻ വിമാന ദുരന്തം ഒഴിവാക്കിയ ഇന്ത്യൻ പൈലറ്റ് ക്യാപ്റ്റൻ സ്മിത് മച്ചാറിന് ലോകമെമ്പാടു നിന്നും പ്രശംസ പ്രവാഹം. ആക്രമണത്തിൽ ഗുരുതരമായി പരിക്കേറ്റ അദ്ദേഹം നിലവിൽ സൗദി അറേബ്യയിലെ തബൂക്കിലുള്ള ആശുപത്രിയിൽ ചികിത്സയിലാണ്. അദ്ദേഹത്തിന്റെ ആരോഗ്യനില തൃപ്തികരമാണെന്ന് റിപ്പോർട്ടുകൾ വ്യക്തമാക്കുന്നു. സൗദി അധികൃതരുമായി സഹകരിച്ച് ആവശ്യമായ എല്ലാ സഹായങ്ങളും ഉറപ്പാക്കുന്നുണ്ടെന്നും കുടുംബവുമായി ബന്ധപ്പെട്ടിട്ടുണ്ടെന്നും റിയാദിലെ ഇന്ത്യൻ എംബസിയും ജിദ്ദയിലെ കോൺസുലേറ്റ് ജനറലും അറിയിച്ചു.

ഗുരുതരമായി പരിക്കേറ്റിട്ടും ധീരമായി പ്രതിരോധിച്ച ക്യാപ്റ്റൻ മച്ചാർ, കോക്ക്പിറ്റിന്റെ വാതിൽ തുറന്നുകൊടുത്ത് യാത്രക്കാർക്കും ക്രൂ അംഗങ്ങൾക്കും അക്രമിയെ കീഴടക്കാൻ അവസരമൊരുക്കുകയായിരുന്നു. അതീവ ഗുരുതരാവസ്ഥയിലും ബുദ്ധിപൂർവം പ്രവർത്തിച്ച് ആകാശത്തുവെച്ച് ഉണ്ടായേക്കാമായിരുന്ന വൻ ദുരന്തമാണ് അദ്ദേഹം തടഞ്ഞതെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് വിശേഷിപ്പിച്ചു. ക്യാപ്റ്റൻ മച്ചാറിന്റെ ധീരതയിൽ ഇന്ത്യ അഭിമാനിക്കുന്നുവെന്ന് പ്രധാനമന്ത്രി നരേന്ദ്ര മോദി വ്യക്തമാക്കിയപ്പോൾ, അദ്ദേഹം ഒരു 'യഥാർത്ഥ നായകനാണെന്ന്' ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവും കുറിച്ചു.

13 വർഷത്തിലേറെ വാണിജ്യ വിമാനങ്ങൾ പറത്തി പരിചയസമ്പത്തുള്ള വിദഗ്ധനായ പൈലറ്റാണ് ക്യാപ്റ്റൻ സ്മിത് മച്ചാർ. ബോയിംഗ് 737 ഫ്ലീറ്റിൽ മാത്രം 9,750-ഓളം മണിക്കൂർ പറക്കൽ പരിചയമുള്ള അദ്ദേഹം, ഇന്ത്യയിലെ സ്പൈസ് ജെറ്റിൽ 10 വർഷത്തിലേറെ സേവനമനുഷ്ഠിച്ച ശേഷമാണ് 2022 ജൂണിൽ ഫ്ലൈ ദുബായിൽ ക്യാപ്റ്റനായി ചുമതലയേൽക്കുന്നത്. "സാഹചര്യങ്ങൾ കൈവിട്ടുപോകുമ്പോഴാണ് ജീവനക്കാരുടെ യഥാർത്ഥ ആവശ്യകത യാത്രക്കാർ മനസ്സിലാക്കുന്നത്" എന്ന് കോക്ക്പിറ്റിലെ സുരക്ഷയെക്കുറിച്ച് മുൻപൊരു അഭിമുഖത്തിൽ അദ്ദേഹം പറഞ്ഞ വാക്കുകൾ അന്വർത്ഥമാക്കുന്നതാണ് ഈ സംഭവം.