‘പ്രസവം സ്ത്രീകളുടെ മാത്രം ഉത്തരവാദിത്തമല്ല’; പ്രസവവും ഗർഭകാലവും ചർച്ചയാക്കി സന്തോഷ് പണ്ഡിറ്റ്

തിരുവനന്തപുരം: ഗർഭധാരണം, പ്രസവം, പ്രസവാനന്തര പരിചരണം എന്നിവയെക്കുറിച്ച് വിവിധ നിരീക്ഷണങ്ങളുമായി നടൻ സന്തോഷ് പണ്ഡിറ്റ്. സ്ത്രീകൾക്ക് ഗർഭകാലത്തും പ്രസവത്തിന് ശേഷവും നേരിടേണ്ടിവരുന്ന ശാരീരികവും മാനസികവുമായ ബുദ്ധിമുട്ടുകൾ ചൂണ്ടിക്കാട്ടിയായിരുന്നു അദ്ദേഹത്തിന്റെ പ്രതികരണം.

കുടുംബാസൂത്രണത്തിന്റെ ഭാഗമായി പരമാവധി ഒന്നോ രണ്ടോ കുട്ടികളിൽ കുടുംബം പരിമിതപ്പെടുത്തുന്നതിനെക്കുറിച്ചും പണ്ഡിറ്റ് അഭിപ്രായപ്പെട്ടു. കൂടുതൽ ഗർഭധാരണങ്ങൾ സ്ത്രീകളുടെ ആരോഗ്യത്തിന് വിവിധ തരത്തിലുള്ള ബുദ്ധിമുട്ടുകൾ സൃഷ്ടിച്ചേക്കാമെന്നാണ് അദ്ദേഹം പറയുന്നത്. എന്നാൽ, കുട്ടികളുടെ എണ്ണം സംബന്ധിച്ച തീരുമാനം വ്യക്തികളുടെ ആരോഗ്യസ്ഥിതിയും കുടുംബ സാഹചര്യങ്ങളും പരിഗണിച്ച് എടുക്കേണ്ടതാണെന്നും അദ്ദേഹം ചൂണ്ടിക്കാട്ടി.

ഗർഭകാലത്തുണ്ടാകുന്ന ശരീരത്തിലെ മാറ്റങ്ങൾ, പ്രസവസമയത്തെ ബുദ്ധിമുട്ടുകൾ, പ്രസവശേഷമുള്ള ആരോഗ്യപ്രശ്നങ്ങൾ എന്നിവയെക്കുറിച്ചും പണ്ഡിറ്റ് തന്റെ കുറിപ്പിൽ വിശദീകരിക്കുന്നുണ്ട്. അമിത രക്തസ്രാവം, പ്രസവം നീണ്ടുപോകുന്നത്, കുഞ്ഞിന്റെ സ്ഥാനം സംബന്ധിച്ച സങ്കീർണതകൾ തുടങ്ങിയവ പ്രസവസമയത്ത് ചില സ്ത്രീകൾ നേരിടുന്ന പ്രശ്നങ്ങളായി അദ്ദേഹം പരാമർശിച്ചു.

ഗർഭകാലത്ത് രക്തസമ്മർദം ഉയരുക, പ്രമേഹം, ശരീരത്തിൽ നീര്, വെരിക്കോസ് വെയിൻ തുടങ്ങിയ ആരോഗ്യപ്രശ്നങ്ങൾ ഉണ്ടാകാമെന്നും അദ്ദേഹം പറയുന്നു. ഹൃദയത്തെ ബാധിക്കുന്ന പെരിപാർട്ടം കാർഡിയോമയോപ്പതി പോലുള്ള അപൂർവമായെങ്കിലും ഗുരുതരമായ അവസ്ഥകളെക്കുറിച്ചും സ്ത്രീകൾ ബോധവതികളായിരിക്കണമെന്നും പണ്ഡിറ്റ് അഭിപ്രായപ്പെട്ടു.

പ്രസവശേഷമുള്ള ഘട്ടത്തിലും സ്ത്രീകൾക്ക് നിരവധി വെല്ലുവിളികൾ നേരിടേണ്ടിവരുമെന്നാണ് അദ്ദേഹത്തിന്റെ വാദം. പൈൽസ്, ഫിഷർ, മലബന്ധം, ശരീരവേദന, ക്ഷീണം, അണുബാധ, മൂത്രം നിയന്ത്രിക്കാൻ കഴിയാത്ത അവസ്ഥ തുടങ്ങിയവയും പ്രസവാനന്തര കാലയളവിൽ ഉണ്ടാകാവുന്ന പ്രശ്നങ്ങളായി അദ്ദേഹം ചൂണ്ടിക്കാട്ടി.

മാനസികാരോഗ്യത്തിനും ഈ ഘട്ടത്തിൽ പ്രാധാന്യം നൽകണമെന്നാണ് പണ്ഡിറ്റിന്റെ മറ്റൊരു നിരീക്ഷണം. പ്രസവശേഷമുള്ള ഹോർമോൺ മാറ്റങ്ങളെത്തുടർന്നുള്ള മാനസികാവസ്ഥാ വ്യതിയാനങ്ങൾ മുതൽ പ്രസവാനന്തര വിഷാദം വരെയുള്ള പ്രശ്നങ്ങളെക്കുറിച്ച് കുടുംബാംഗങ്ങൾ ശ്രദ്ധ പുലർത്തണമെന്നും അദ്ദേഹം പറയുന്നു.

ഗർഭകാലത്തെ പരിശോധനകളെക്കുറിച്ചും പണ്ഡിറ്റ് കുറിപ്പിൽ പരാമർശിക്കുന്നുണ്ട്. ഗർഭകാലത്ത് ഡേറ്റിങ് സ്കാൻ, എൻ.ടി. സ്കാൻ, അനോമലി സ്കാൻ, ഗ്രോത്ത് സ്കാൻ തുടങ്ങിയ പരിശോധനകൾ നടത്തുന്നതിനെക്കുറിച്ചാണ് അദ്ദേഹം വിശദീകരിച്ചത്. അമ്മയുടെയും കുഞ്ഞിന്റെയും ആരോഗ്യനില വിലയിരുത്തുന്നതിന് ആവശ്യമായ പരിശോധനകൾ ഡോക്ടറുടെ നിർദേശപ്രകാരം നടത്തണമെന്നതാണ് ഇതിന്റെ പ്രധാന സന്ദേശം.

പ്രസവത്തെ ഒരു സ്വാഭാവിക ശാരീരിക പ്രക്രിയയായി കാണണമെന്നും അതേസമയം ആരോഗ്യപരമായ അപകടസാധ്യതകളെക്കുറിച്ച് ജാഗ്രത പുലർത്തണമെന്നും പണ്ഡിറ്റ് പറയുന്നു. സ്ത്രീകളുടെ ആരോഗ്യവും പ്രസവാനന്തര പരിചരണവും കുടുംബവും സമൂഹവും ഗൗരവത്തോടെ കാണണമെന്നും അദ്ദേഹം ആവശ്യപ്പെട്ടു.

കുഞ്ഞിന്റെ ജനനത്തിന് പിന്നിലെ ശാരീരികവും മാനസികവുമായ ബുദ്ധിമുട്ടുകൾ പ്രധാനമായും സ്ത്രീയാണ് അനുഭവിക്കുന്നതെന്നും പുരുഷന്റെ ഉത്തരവാദിത്തം അതോടെ അവസാനിക്കരുതെന്നും പണ്ഡിറ്റ് അഭിപ്രായപ്പെട്ടു. ഗർഭകാലം മുതൽ പ്രസവാനന്തര പരിചരണം വരെയുള്ള ഘട്ടങ്ങളിൽ പങ്കാളിയുടെ പിന്തുണ നിർണായകമാണെന്ന സന്ദേശവും കുറിപ്പിലൂടെ അദ്ദേഹം മുന്നോട്ടുവച്ചു.