'കുറ്റം ചെയ്താൽ ശിക്ഷ ഉറപ്പ്'; സ്ത്രീസുരക്ഷ ഉറപ്പാക്കാൻ പൊലീസിന് സുപ്രീം കോടതിയുടെ കർശന നിർദ്ദേശം
'ഇനി കുറ്റം ചെയ്താൽ മരണം ഉറപ്പ്' എന്ന തരത്തിലുള്ള ഭയം കുറ്റവാളികളിൽ ഉണ്ടാകണമെന്നും കോടതി ആവശ്യപ്പെട്ടു.
ന്യൂഡൽഹി: രാജ്യതലസ്ഥാനത്ത് രാത്രിയിലടക്കം ഏതൊരു സ്ത്രീക്കും പൂർണ്ണ സുരക്ഷിതത്വം ഉറപ്പാക്കണമെന്ന് സുപ്രീം കോടതിയുടെ കർശന നിർദ്ദേശം. സുരക്ഷാ പദ്ധതികളും നിർദ്ദേശങ്ങളും വെറും കടലാസിലൊതുങ്ങാതെ അടിയന്തരമായി പ്രയോഗത്തിൽ വരുത്താൻ പോലീസ് തയ്യാറാകണം. ഏതെങ്കിലും കോണുകളിൽ നിന്ന് എതിർപ്പുകൾ ഉയർന്നാലും അതിക്രമങ്ങൾ തടയുന്നതിൽ പോലീസ് വിട്ടുവീഴ്ച ചെയ്യരുതെന്നും ജസ്റ്റിസ് ജെ. ബി. പർദിവാല അധ്യക്ഷനായ ബെഞ്ച് വ്യക്തമാക്കി.
സാമൂഹ്യവിരുദ്ധരുടെയും കുറ്റവാളികളുടെയും മനസ്സിൽ കടുത്ത ഭയം സൃഷ്ടിക്കാതെ ഇത്തരം കുറ്റകൃത്യങ്ങൾക്ക് തടയിടാനാകില്ല. 'കുറ്റം ചെയ്താൽ കടുത്ത ശിക്ഷ ഉറപ്പ്' എന്ന തരത്തിലുള്ള ഭീതി കുറ്റവാളികളിൽ ഉണ്ടാക്കുന്ന രീതിയിൽ പോലീസ് സ്വന്തം കടമ കൃത്യമായി നിർവ്വഹിക്കണമെന്നും പരമോന്നത കോടതി ചൂണ്ടിക്കാട്ടി.
ഉത്സവകാലം അടുത്തിരിക്കെ തലസ്ഥാനത്ത് സാമൂഹ്യവിരുദ്ധരെ പൂർണ്ണമായി നിയന്ത്രിക്കാൻ പൊലീസിന് സാധിക്കണമെന്ന് സുപ്രീം കോടതി നിർദ്ദേശിച്ചു. സാഹചര്യത്തിനനുസരിച്ച് ഉയർന്ന് പ്രവർത്തിക്കാനും ഏത് കടുത്ത നടപടികളും സ്വീകരിക്കാനും പോലീസിന് പൂർണ്ണ സ്വാതന്ത്ര്യമുണ്ടെന്ന് കോടതി വ്യക്തമാക്കി.
മുൻകാലങ്ങളിലെ പാളിച്ചകൾ പരിഹരിച്ച് ഇതൊരു വെല്ലുവിളിയായി ഏറ്റെടുക്കണം. പൊതുസ്ഥലങ്ങളിലും പാർക്കുകളിലും സിസിടിവി നിരീക്ഷണം ശക്തമാക്കാനും അതിക്രമങ്ങൾ ആവർത്തിക്കാതിരിക്കാൻ ശക്തമായ കരുതൽ നടപടികൾ സ്വീകരിക്കാനും നിർദ്ദേശമുണ്ട്. കേസ് കൂടുതൽ വാദത്തിനായി നവംബർ 16-ലേക്ക് മാറ്റി. പരമോന്നത കോടതിയുടെ ഈ കർശന നിലപാട് തലസ്ഥാനത്ത് സ്ത്രീകൾക്കെതിരെയുള്ള അതിക്രമങ്ങൾ തടയുന്നതിൽ വലിയ മാറ്റങ്ങൾക്ക് വഴിതുറക്കുമെന്നാണ് വിലയിരുത്തപ്പെടുന്നത്.
Comments ()