പ്രീമിയം ബൈക്ക് ഇനി വിരൽത്തുമ്പിൽ: യെസ്ഡി റോഡ്സ്റ്റർ റെഡ് വുൾഫ് ആമസോണിലും ഫ്ലിപ്കാർട്ടിലും

ജാവ യെസ്ഡി മോട്ടോർസൈക്കിൾസിന്റെ ജനപ്രിയ മോഡലായ യെസ്ഡി റോഡ്സ്റ്റർ റെഡ് വുൾഫ് ഇനി ആമസോൺ, ഫ്ലിപ്‍കാർട്ട് തുടങ്ങിയ ഇ-കോമേഴ്സ് പ്ലാറ്റ്‌ഫോമുകൾ വഴി ബുക്ക് ചെയ്യാം. ഡിജിറ്റൽ ഷോപ്പിംഗിനോട് ഉപഭോക്താക്കൾക്കുള്ള താല്പര്യം മുന്നിൽ കണ്ടാണ് കൂടുതൽ ആളുകളിലേക്ക് ബൈക്ക് എത്തിക്കാൻ കമ്പനി ഈ പുതിയ നീക്കം നടപ്പിലാക്കിയിരിക്കുന്നത്. 1970-കളിലെ ക്ലാസിക് ലുക്കിൽ, കടുംചുവപ്പ് നിറവും ക്രോം ഡീറ്റെയ്‌ലിംഗുമായി എത്തുന്ന ഈ പ്രീമിയം റോഡ്സ്റ്ററിന് 2,09,950 രൂപയാണ് എക്‌സ്-ഷോറൂം വില. 350 സിസി ആൽഫ2 ലിക്വിഡ്-കൂൾഡ് എൻജിൻ, 6-സ്പീഡ് ഗിയർബോക്‌സ്, അസിസ്റ്റ് ആൻഡ് സ്ലിപ്പർ ക്ലച്ച്, ഡ്യുവൽ-ചാനൽ എബിഎസ് എന്നിവയാണ് പ്രധാന ഫീച്ചറുകൾ. 12.5 ലിറ്റർ ഇന്ധന ടാങ്കുള്ള ഈ ബൈക്കിന് ഒറ്റ ഫുൾ ടാങ്കിൽ 350 കിലോമീറ്ററിലധികം മൈലേജ് ലഭിക്കുമെന്നും കമ്പനി അവകാശപ്പെടുന്നു.

ഓൺലൈൻ വഴി വളരെ ലളിതമായി ബൈക്ക് സ്വന്തമാക്കാവുന്നതാണ്. ആമസോണിലോ ഫ്ലിപ്കാർട്ടിലോ എക്സ്-ഷോറൂം നിരക്കിൽ ബുക്കിംഗ് തുക അടച്ചാൽ, തൊട്ടടുത്തുള്ള അംഗീകൃത ഡീലർ ഓർഡർ സ്ഥിരീകരിക്കും. തുടർന്ന് ബാക്കി വരുന്ന ഓൺ-റോഡ് തുകയും മറ്റ് ചാർജുകളും ഡീലർഷിപ്പിൽ നേരിട്ട് അടച്ച്, ഇൻഷുറൻസും രജിസ്ട്രേഷനും പൂർത്തിയാക്കി ബൈക്ക് ഡെലിവറി കൈപ്പറ്റാം. ആവശ്യമെങ്കിൽ അധിക ആക്‌സസറികളും ഡീലർഷിപ്പിൽ നിന്ന് വാങ്ങാവുന്നതാണ്. ഇന്ത്യയിലുടനീളമുള്ള 450-ലധികം വിൽപ്പന-സർവീസ് കേന്ദ്രങ്ങളുടെ പിന്തുണയോടെയാണ് കമ്പനി പ്രവർത്തിക്കുന്നത്. ഇതിനുപുറമേ, ഉപഭോക്താക്കൾക്കായി 4 വർഷം അല്ലെങ്കിൽ 50,000 കിലോമീറ്റർ സ്റ്റാൻഡേർഡ് വാറന്റിയും (6 വർഷം വരെ നീട്ടാവുന്നത്), 8 വർഷം വരെ റോഡ്‌സൈഡ് അസിസ്റ്റൻസും, 5 വർഷം വരെയുള്ള എഎംസി (AMC) സൗകര്യവും ഉൾപ്പെടുന്ന മികച്ച ഓണർഷിപ്പ് അഷ്വറൻസ് പ്രോഗ്രാമും ജാവ യെസ്ഡി വാഗ്ദാനം ചെയ്യുന്നുണ്ട്.