ടെസ്‌ലയുടെ സ്വപ്ന വാഹനം റോഡ്‌സ്റ്റർ വിപണിയിലേക്ക്; ബുക്കിങ് തുകയും സവിശേഷതകളും അറിയാം

വാഷിങ്ടണ്‍: ഏറെ പ്രതീക്ഷയോടെ കാത്തിരിക്കുന്ന ടെസ്‌ലയുടെ പറക്കും കാറിന്റെ (റോഡ്‌സ്റ്റർ) ബുക്കിങ് ആരംഭിച്ചു. 2028-ൽ വിപണിയിലിറക്കാൻ പ്രഖ്യാപിച്ചിരിക്കുന്ന വാഹനത്തിന്റെ ബുക്കിങ് വിവരങ്ങളും സാങ്കേതിക സവിശേഷതകളും കമ്പനി ഔദ്യോഗികമായി പുറത്തുവിട്ടു.

വാഹനത്തിന്റെ ബുക്കിങ്ങിനായി ആദ്യ ഗഡുവായി 5 ലക്ഷം രൂപയാണ് നൽകേണ്ടത്. തുടർന്ന് പെർഫോമൻസ് മോഡലിന് 10 ദിവസത്തിനുള്ളിൽ 50 ലക്ഷം രൂപയും, ത്രസ്റ്റ് മോഡലിന് 10 ദിവസത്തിനുള്ളിൽ 2.5 കോടി രൂപയും അടയ്ക്കണം. വാഹനത്തിന്റെ അന്തിമ വില ടെസ്‌ല ഇതുവരെ പ്രഖ്യാപിച്ചിട്ടില്ല. 2028-ൽ റോഡ്‌സ്റ്റാറിന്റെ ആഗോള വിൽപന ആരംഭിക്കുമെന്നും, അതിനുശേഷമുള്ള വർഷം വാഹനം ഇന്ത്യയിലെത്തുമെന്നുമാണ് പ്രതീക്ഷിക്കുന്നത്.

SR-71, F-35 എന്നീ അത്യാധുനിക യുദ്ധവിമാനങ്ങളിൽ നിന്ന് പ്രചോദനം ഉൾക്കൊണ്ടാണ് പുതിയ റോഡ്‌സ്റ്റർ രൂപകൽപ്പന ചെയ്തിരിക്കുന്നത്. മറഞ്ഞിരിക്കുന്ന ഹെഡ്‌ലൈറ്റുകൾ, നീക്കം ചെയ്യാവുന്ന ഗ്ലാസ് റൂഫ് പാനലുകൾ, എയർബ്രേക്കായി പ്രവർത്തിക്കുന്ന ആക്റ്റീവ് റിയർ വിംഗ് എന്നിവ ഇതിന്റെ പ്രധാന ഡിസൈൻ ഹൈലൈറ്റുകളാണ്. വാഹനത്തിനുള്ളിൽ സ്റ്റിയറിംഗ് യോക്ക് (steering yoke), ഡ്രൈവർക്ക് അഭിമുഖമായുള്ള ടച്ച്‌സ്‌ക്രീൻ, മാനുവലായി ക്രമീകരിക്കാവുന്ന പെഡലുകൾ എന്നിവ സജ്ജീകരിച്ചിരിക്കുന്നു. ടെസ്‌ല തങ്ങളുടെ രണ്ടാം തലമുറ റോഡ്‌സ്റ്റർ കൺസെപ്റ്റ് അവതരിപ്പിച്ച് ഒമ്പത് വർഷത്തിന് ശേഷമാണ് ഉൽപ്പാദനത്തിന് സജ്ജമായ പ്രോട്ടോടൈപ്പ് മോഡൽ ഇപ്പോൾ പ്രദർശിപ്പിച്ചിരിക്കുന്നത്.

ഈ പ്രോട്ടോടൈപ്പിന്റെ പിൻ ആക്സിലിൽ രണ്ട് ഇലക്ട്രിക് മോട്ടോറുകളാണുള്ളത്. ഇവയുടെ സംയോജിത ഔട്ട്പുട്ട് 1 മെഗാവാട്ട് (MW) ആണ് - ഇത് ഏകദേശം 1,341 മെക്കാനിക്കൽ ഹോഴ്സ്പവറിന് (hp) തുല്യമാണ്. 4680-സെൽ ബാറ്ററിയിൽ നിന്നാണ് മോട്ടോറുകൾക്ക് ഊർജ്ജം ലഭിക്കുന്നത്.

483 കിലോമീറ്ററിലധികം ഡ്രൈവിംഗ് റേഞ്ചും, 10 മുതൽ 80 ശതമാനം വരെ ചാർജ് ചെയ്യാൻ വെറും 10 മുതൽ 12 മിനിറ്റ് വരെ സമയവുമാണ് ടെസ്‌ല ലക്ഷ്യമിടുന്നത്. ഇതിനുപുറമേ കാർബൺ സെറാമിക് ബ്രേക്കുകൾ, ഉയരം ക്രമീകരിക്കാവുന്ന സ്പൂൾ-വാൽവ് ഡാംപറുകൾ എന്നിവയും ഉൾപ്പെടുത്തിയിട്ടുണ്ട്. ആകെ 1,700 കിലോഗ്രാം ഭാരമാണ് ഈ വാഹനത്തിനായി ടെസ്‌ല ലക്ഷ്യമിടുന്നത്.