ജനലുകളിൽ ഇരുമ്പുവേലി ഇടുന്നവർ സൂക്ഷിക്കുക; അബുദാബിയിൽ വൻ തുക പിഴ

അബുദാബിയിൽ കെട്ടിടങ്ങളുടെ മുകളിലത്തെ നിലകളിലെ ജനലുകളിൽ അഗ്നിശമന-രക്ഷാപ്രവർത്തനങ്ങൾക്ക് തടസ്സമുണ്ടാക്കുന്ന രീതിയിൽ ഇരുമ്പുവേലികളോ മറ്റ് തടസ്സങ്ങളോ സ്ഥാപിക്കുന്നതിനെതിരെ അബുദാബി സിവിൽ ഡിഫൻസ് ശക്തമായ മുന്നറിയിപ്പ് നൽകി. യുഎഇയിലെ സിവിൽ ഡിഫൻസ് സേവനങ്ങളുടെ പ്രവർത്തനം നിയന്ത്രിക്കുന്ന 2012-ലെ കാബിനറ്റ് പ്രമേയം നമ്പർ 24 അടിസ്ഥാനമാക്കിയുള്ള ക്ലോസ് 67 പ്രകാരം ഇത്തരം നിയമലംഘനങ്ങൾക്ക് 30,000 ദിർഹം വരെ പിഴ ചുമത്താവുന്നതാണ്.

ഗ്രൗണ്ട് ഫ്ലോറിന് മുകളിലുള്ള നിലകളിലെ ജനലുകളിലൂടെ പുറത്തുനിന്നുള്ള പ്രവേശം തടയുന്ന കെട്ടിടങ്ങളെയാണ് ഈ നിയമം പ്രധാനമായും ലക്ഷ്യമിടുന്നത്. അടിയന്തര സാഹചര്യങ്ങളിൽ സിവിൽ ഡിഫൻസ് ഉദ്യോഗസ്ഥർക്ക് കെട്ടിടത്തിനുള്ളിലേക്ക് പ്രവേശിച്ച് രക്ഷാപ്രവർത്തനങ്ങളും തീപിടുത്തം നിയന്ത്രിക്കലും വേഗത്തിൽ നടത്താൻ ഇത്തരം ഇരുമ്പുവേലികൾ വലിയ ബുദ്ധിമുട്ടുണ്ടാക്കുമെന്ന് അധികൃതർ വ്യക്തമാക്കി.

നിലവിലുള്ള കെട്ടിടങ്ങൾക്കും നിർമ്മാണത്തിലിരിക്കുന്ന കെട്ടിടങ്ങൾക്കും ഈ വ്യവസ്ഥ ഒരുപോലെ ബാധകമാണെങ്കിലും സ്വതന്ത്ര സ്വകാര്യ വീടുകളെയും റെസിഡൻഷ്യൽ വീടുകളെയും ഇതിൽ നിന്ന് ഒഴിവാക്കിയിട്ടുണ്ട്. അടിയന്തര ഘട്ടങ്ങളിൽ രക്ഷാപ്രവർത്തകർക്ക് തടസ്സമില്ലാതെ പ്രവേശിക്കാൻ കഴിയുന്ന വിധത്തിൽ ജനലുകളും സുരക്ഷാ സംവിധാനങ്ങളും ക്രമീകരിക്കണമെന്നും ബാധകമായ എല്ലാ സുരക്ഷാ നിയമങ്ങളും പാലിക്കുന്നുണ്ടെന്ന് ഉറപ്പാക്കണമെന്നും കെട്ടിട ഉടമകൾക്കും നിർമ്മാതാക്കൾക്കും അധികൃതർ നിർദ്ദേശം നൽകി.