മലയാള സിനിമയ്ക്ക് തീരാനഷ്ടം; സംവിധായകൻ ആർ. ശരത് അന്തരിച്ചു
‘സായാഹ്നം’, ‘ശീലാബതി’, ‘ബുദ്ധൻ ചിരിക്കുന്നു’, ‘സ്ഥിതി’ തുടങ്ങിയ ചിത്രങ്ങളിലൂടെ ശ്രദ്ധേയനായ സംവിധായകനായിരുന്നു ആർ. ശരത്. അദ്ദേഹത്തിന്റെ ‘സായാഹ്നം’ നിരവധി പുരസ്കാരങ്ങൾ സ്വന്തമാക്കിയ ചിത്രമാണ്. ഏഴ് സംസ്ഥാന പുരസ്കാരങ്ങളാണ് ചിത്രത്തിന് ലഭിച്ചത്
കൊച്ചി: മലയാള സിനിമയിലെ ശ്രദ്ധേയനായ സംവിധായകനും ഡോക്യുമെന്ററി പ്രവർത്തകനുമായ ആർ. ശരത് അന്തരിച്ചു. 63 വയസ്സായിരുന്നു. തിരുവനന്തപുരത്തെ സ്വകാര്യ ആശുപത്രിയിൽ ചികിത്സയിലിരിക്കെയാണ് അന്ത്യം.
‘സായാഹ്നം’, ‘ശീലാബതി’, ‘ബുദ്ധൻ ചിരിക്കുന്നു’, ‘സ്ഥിതി’ തുടങ്ങിയ ചിത്രങ്ങളിലൂടെ ശ്രദ്ധേയനായ സംവിധായകനായിരുന്നു ആർ. ശരത്. അദ്ദേഹത്തിന്റെ ‘സായാഹ്നം’ നിരവധി പുരസ്കാരങ്ങൾ സ്വന്തമാക്കിയ ചിത്രമാണ്. ഏഴ് സംസ്ഥാന പുരസ്കാരങ്ങളാണ് ചിത്രത്തിന് ലഭിച്ചത്.
ഡോക്യുമെന്ററി സംവിധായകനായാണ് ആർ. ശരത് സിനിമാരംഗത്തേക്ക് എത്തിയത്. ‘ദി പെയിന്റഡ് എപ്പിക്സ്’ എന്ന ഡോക്യുമെന്ററിയുടെ ചിത്രീകരണത്തിനിടയിൽ രാജാ രവിവർമയുമായി ബന്ധപ്പെട്ട അപൂർവ ചുവർചിത്രങ്ങൾ കണ്ടെത്തിയത് അദ്ദേഹത്തിന്റെ കരിയറിലെ പ്രധാനപ്പെട്ടൊരു ഘട്ടമായി. ഇതുവരെ പൊതുജനങ്ങൾക്ക് മുന്നിൽ പ്രദർശിപ്പിച്ചിട്ടില്ലാത്ത ചുവർചിത്രങ്ങളായിരുന്നു ഇവ. രവിവർമ ചിത്രങ്ങളുടെ ചരിത്രത്തിൽ ശ്രദ്ധേയമായ കണ്ടെത്തലായാണ് ഇതിനെ വിലയിരുത്തിയത്.
ചുവർചിത്രങ്ങളെക്കുറിച്ചുള്ള ഗവേഷണത്തിനായി 1996ൽ കേന്ദ്രസർക്കാരിന്റെ സാംസ്കാരിക വകുപ്പിൽനിന്ന് ആർ. ശരത്തിന് ജൂനിയർ ഫെലോഷിപ്പും ലഭിച്ചു. കലയും ചരിത്രവും സിനിമയും കൂട്ടിയിണക്കിയ അദ്ദേഹത്തിന്റെ പ്രവർത്തനങ്ങളിൽ ഈ ഗവേഷണത്തിന് പ്രത്യേക സ്ഥാനമുണ്ടായിരുന്നു.
ഒ.എൻ.വി. കുറുപ്പിന്റെ കവിതയെ ആസ്പദമാക്കി ഒരുക്കിയ ‘ഭൂമിക്ക് ഒരു ചരമഗീതം’ എന്ന ഹ്രസ്വചിത്രവും ഏറെ ശ്രദ്ധിക്കപ്പെട്ടു. പരിസ്ഥിതിയും സ്ത്രീത്വവും പ്രമേയമാക്കിയായിരുന്നു ചിത്രം.
സെക്രട്ടേറിയറ്റിൽ ജോലി ചെയ്യുന്ന ദമ്പതികളുടെ ജീവിതം പ്രമേയമാക്കിയ ‘സ്ഥിതി’യും ആർ. ശരത്തിന്റെ ശ്രദ്ധേയമായ ചിത്രങ്ങളിലൊന്നാണ്. പിന്നണി ഗായകൻ ഉണ്ണി മേനോൻ പ്രധാന കഥാപാത്രത്തെ അവതരിപ്പിച്ച ചിത്രത്തിന് നിരൂപക പ്രശംസയും ലഭിച്ചിരുന്നു.
സംവിധായകനെന്ന നിലയിലെ ആദ്യ ചിത്രത്തിന് ലഭിച്ച ഇന്ദിരാഗാന്ധി പുരസ്കാരം ഉൾപ്പെടെ ദേശീയ, സംസ്ഥാന തലങ്ങളിൽ നിരവധി അംഗീകാരങ്ങൾ ആർ. ശരത്തിനെ തേടിയെത്തി. മികച്ച മലയാള ഫീച്ചർ ചിത്രത്തിനുള്ള ദേശീയ ചലച്ചിത്ര പുരസ്കാരം, മികച്ച ചിത്രത്തിനും രണ്ടാമത്തെ മികച്ച ചിത്രത്തിനുമുള്ള കേരള സംസ്ഥാന ചലച്ചിത്ര പുരസ്കാരങ്ങൾ, മികച്ച ഹ്രസ്വചിത്രം, മികച്ച കഥ തുടങ്ങിയ വിഭാഗങ്ങളിലെ സംസ്ഥാന പുരസ്കാരങ്ങളും അദ്ദേഹത്തിന്റെ സൃഷ്ടികൾക്ക് ലഭിച്ചിട്ടുണ്ട്.
മലയാള സിനിമയിലും ഡോക്യുമെന്ററി രംഗത്തും വേറിട്ട ഇടപെടലുകൾ നടത്തിയ സംവിധായകനായിരുന്നു ആർ. ശരത്. അദ്ദേഹത്തിന്റെ നിര്യാണത്തോടെ കലാ-സാംസ്കാരിക രംഗത്തിന് ശ്രദ്ധേയനായ ഒരു സാന്നിധ്യത്തെയാണ് നഷ്ടമായത്.
Comments ()