ജോലിക്കിടെ ന്യുമോണിയ ബാധിച്ചു; സൗദിയിൽ മലയാളി നഴ്‌സിന് ദാരുണാന്ത്യം

റിയാദ്: സൗദി അറേബ്യയിലെ അബഹയിൽ ചികിത്സയിലായിരുന്ന മലയാളി നഴ്‌സ് മരിച്ചു. എറണാകുളം മീൻപാറ ആറ്റുപുറത്ത് സ്വദേശിനിയായ സീന ഉതുപ്പ് (42) ആണ് മരണത്തിന് കീഴടങ്ങിയത്. കഴിഞ്ഞ 16 വർഷമായി അബഹയിലെ അസീർ സെൻട്രൽ ആശുപത്രിയിൽ സ്റ്റാഫ് നഴ്‌സായി സേവനമനുഷ്ഠിച്ചുവരികയായിരുന്നു.

ജോലിക്കിടെയാണ് സീനയ്ക്ക് ന്യുമോണിയ ബാധിച്ചത്. തുടർന്ന് അസീർ സെൻട്രൽ ആശുപത്രിയിൽ പ്രവേശിപ്പിച്ചെങ്കിലും ആരോഗ്യനില ക്രമേണ വഷളാവുകയായിരുന്നു. കഴിഞ്ഞ മൂന്ന് മാസമായി തീവ്രപരിചരണ വിഭാഗത്തിൽ വെന്റിലേറ്ററിന്റെ സഹായത്തോടെയായിരുന്നു ചികിത്സ. ചികിത്സ തുടരുന്നതിനിടെയാണ് ഇന്ന് അന്ത്യം സംഭവിച്ചത്.

കോലഞ്ചേരി സ്വദേശിയും അബഹയിലെ യു.പി.എസ് കൊറിയർ കമ്പനിയിലെ ജീവനക്കാരനുമായ ഷിബിൻ മാത്യുവാണ് ഭർത്താവ്. അന്നലിയയും അലോണയും മക്കളാണ്. പിതാവ് ഉതുപ്പും മാതാവ് സരളമ്മയും ഉൾപ്പെടുന്നതാണ് കുടുംബം.

നിയമനടപടികൾ പൂർത്തിയാക്കിയ ശേഷം സീനയുടെ മൃതദേഹം എത്രയും വേഗം നാട്ടിലെത്തിക്കാനുള്ള നടപടികൾ പുരോഗമിക്കുകയാണ്. ഇതിനായി ഭർത്താവ് ഷിബിൻ മാത്യുവിനൊപ്പം സാമൂഹിക പ്രവർത്തകൻ ഹനീഫ് മഞ്ചേശ്വരവും സുഹൃത്ത് ബിനുവും ബന്ധപ്പെട്ട നടപടികൾ ഏകോപിപ്പിച്ചുവരുന്നു.