സിനിമ കാണാൻ ഇനി പോക്കറ്റ് കീറും; മുംബൈയിൽ വിനോദനികുതിയിൽ വൻ വർധനവിന് ശുപാർശ

മുംബൈ നഗരത്തിൽ സിനിമ കാണാനും സംഗീതപരിപാടികൾ ആസ്വദിക്കാനും ഇനി ചെലവേറും. വിനോദനികുതിയിൽ 100 മുതൽ 570 ശതമാനം വരെ വലിയ വർധനവരുത്താനാണ് മുംബൈ മുനിസിപ്പൽ കോർപ്പറേഷന്റെ പുതിയ ശുപാർശ. 1969-ന് ശേഷം, അതായത് നീണ്ട 57 വർഷങ്ങൾക്ക് ശേഷമാണ് നഗരത്തിൽ വിനോദനികുതി ഘടന പരിഷ്കരിക്കുന്നത്. 128 വർഷങ്ങൾക്ക് മുൻപ് ഫ്രഞ്ച് സഹോദരന്മാരായ ലൂമിയർ ബ്രദേഴ്സ് വാട്സൺസ് ഹോട്ടലിൽ കേവലം ഒരു രൂപ ടിക്കറ്റ് നിരക്കിൽ ഇന്ത്യയിലെ ആദ്യ ചലച്ചിത്രം പ്രദർശിപ്പിച്ച ചരിത്രമുള്ള മുംബൈയിലാണ് ഈ ഭീമമായ നികുതിവർധന വരുന്നത്. എന്നാൽ മറാഠി, ഗുജറാത്തി ഭാഷകളിലുള്ള സിനിമകൾക്കും കലാപരിപാടികൾക്കും ഈ നികുതിയിൽ 100 ശതമാനം ഇളവ് പ്രഖ്യാപിച്ചിട്ടുണ്ട്.

പുതിയ ശുപാർശ പ്രകാരം എസി മൾട്ടിപ്ലക്സ് തിയേറ്ററുകളിലെ ടിക്കറ്റ് നികുതി 60 രൂപയിൽ നിന്ന് 400 രൂപയായും (570% വർധന), നോൺ-എസി തിയേറ്ററുകളിൽ 45 രൂപയിൽ നിന്ന് 200 രൂപയായും (400% വർധന) ഉയരും. നാടകങ്ങൾക്കും സംഗീതപരിപാടികൾക്കുമുള്ള നികുതി 25 രൂപയിൽ നിന്ന് 100 രൂപയായും (300% വർധന), സർക്കസ്, കാർണിവൽ എന്നിവയുടേത് 50 രൂപയിൽ നിന്ന് 100 രൂപയായും (100% വർധന) വർധിക്കും. കൂടാതെ, മിനി തിയേറ്ററുകൾക്കും വീഡിയോ പ്രദർശനങ്ങൾക്കും ടിക്കറ്റൊന്നിന് 90 രൂപ നിരക്കിൽ പുതിയ നികുതിയും ഏർപ്പെടുത്തിയിട്ടുണ്ട്.

നിലവിൽ വിനോദനികുതിയിനത്തിൽ 360 കോടി രൂപ വരുമാനം ലഭിക്കുന്ന മുംബൈ കോർപ്പറേഷന്, മഹാരാഷ്ട്ര നഗരവികസന വകുപ്പിന്റെ അംഗീകാരത്തിനായി സമർപ്പിച്ച ഈ ശുപാർശ പ്രാബല്യത്തിൽ വരുന്നതോടെ വരുമാനം 500 മുതൽ 550 കോടി രൂപയായി ഉയരുമെന്നാണ് പ്രതീക്ഷിക്കുന്നത്. ചുരുക്കത്തിൽ, വിലക്കയറ്റത്തിനും ജോലിസമ്മർദത്തിനുമിടയിൽ ഒരു സിനിമയോ പാട്ടോ ആസ്വദിച്ച് ആശ്വാസം കണ്ടെത്താമെന്ന് കരുതുന്ന സാധാരണക്കാർക്ക് മുംബൈ ഇനി ഇരട്ടി ചെലവുള്ള നഗരമായി മാറും.