സ്വർണവിലയിൽ വീണ്ടും ഇടിവ്; പവന് ₹480 കുറഞ്ഞു, ഒരാഴ്ചയിൽ നഷ്ടം ₹3000ഓളം

കൊച്ചി: സംസ്ഥാനത്തെ സ്വർണവിലയിൽ തുടർച്ചയായ ഇടിവ് തുടരുന്നു. തിങ്കളാഴ്ച പവന് 480 രൂപ കുറഞ്ഞതോടെ ഒരു പവൻ സ്വർണത്തിന്റെ വില 1,05,240 രൂപയായി. ഗ്രാമിന് 60 രൂപയുടെ കുറവാണ് രേഖപ്പെടുത്തിയത്. ഇതോടെ ഒരു ഗ്രാം സ്വർണത്തിന്റെ വില 13,155 രൂപയായി.

കഴിഞ്ഞ ഒരാഴ്ചയ്ക്കിടെ സ്വർണവിലയിൽ ഏകദേശം 3000 രൂപയുടെ ഇടിവാണ് ഉണ്ടായത്. ആഗോള വിപണിയിലെ മാറ്റങ്ങളാണ് ആഭ്യന്തര വിപണിയിലും പ്രതിഫലിക്കുന്നതെന്ന് വ്യാപാര രംഗത്തെ വിദഗ്ധർ വിലയിരുത്തുന്നു.

അമേരിക്കയും ഇറാനും തമ്മിലുള്ള സംഘർഷത്തിൽ അയവ് വന്നതും ഇതിന്റെ ഭാഗമായി ക്രൂഡ് ഓയിൽ വില കുറഞ്ഞതും സ്വർണത്തിന്റെ സുരക്ഷിത നിക്ഷേപ ആവശ്യകതയെ ബാധിച്ചതായി ചൂണ്ടിക്കാണിക്കപ്പെടുന്നു. ഡോളറിന്റെ മൂല്യം ശക്തിപ്പെട്ടതും സ്വർണവില കുറയാൻ കാരണമായെന്നാണ് വിപണി നിരീക്ഷണം.

അടുത്ത കാലയളവിൽ പലിശനിരക്ക് സംബന്ധിച്ച് അമേരിക്കൻ കേന്ദ്ര ബാങ്കിന്റെ നിലപാടുകൾ സ്വർണവിപണിയെ സ്വാധീനിക്കുമെന്നാണ് വിലയിരുത്തൽ. ഉടൻ പലിശനിരക്ക് ഉയർത്താൻ സാധ്യതയില്ലെങ്കിലും ഭാവിയിൽ വർധന പരിഗണിക്കുമെന്ന റിപ്പോർട്ടുകളും സ്വർണവിലയിലെ ചലനങ്ങൾക്ക് കാരണമായി.

അന്താരാഷ്ട്ര വിപണിയിലെ സാഹചര്യങ്ങൾക്കനുസരിച്ച് വരും ദിവസങ്ങളിലും കേരളത്തിലെ സ്വർണവിലയിൽ മാറ്റങ്ങൾ ഉണ്ടാകാൻ സാധ്യതയുണ്ട്. ഈ വർഷം ജനുവരി 29ന് പവന് 1,31,160 രൂപ രേഖപ്പെടുത്തിയതാണ് സംസ്ഥാനത്തെ സ്വർണവിലയിലെ ഏറ്റവും ഉയർന്ന നിരക്ക്. ഡിസംബർ 23നാണ് പവൻ വില ആദ്യമായി ഒരു ലക്ഷം രൂപ കടന്നത്.