ദുബായിൽ സ്വർണവില വീണ്ടും കുതിച്ചു; 24 കാരറ്റ് ഗ്രാമിന് 500 ദിർഹം കടന്നു

ദുബായ്: രാജ്യാന്തര വിപണിയിലെ വിലവർധനയുടെ പശ്ചാത്തലത്തിൽ ദുബായിൽ സ്വർണവില വീണ്ടും ഉയർന്നു. വെള്ളിയാഴ്ച രാവിലെ പുറത്തുവിട്ട നിരക്കുകൾ പ്രകാരം 24 കാരറ്റ് സ്വർണത്തിന്റെ ഗ്രാമിന് വില 503.50 ദിർഹമായി ഉയർന്നതോടെ വീണ്ടും 500 ദിർഹത്തിന് മുകളിലെത്തി.

വ്യാഴാഴ്ച 494.75 ദിർഹമായിരുന്ന 24 കാരറ്റ് സ്വർണവില ഒരു ദിവസത്തിനിടെ ഗണ്യമായ വർധനയാണ് രേഖപ്പെടുത്തിയത്. 22 കാരറ്റ് സ്വർണത്തിന്റെ ഗ്രാമിന് വിലയും 458 ദിർഹത്തിൽ നിന്ന് 466.25 ദിർഹമായി ഉയർന്നു.

പുതിയ വർധനയോടെ ജൂൺ മൂന്നാംവാരത്തിലെ നിലവാരത്തിലേക്കാണ് ദുബായിലെ സ്വർണവില തിരിച്ചെത്തിയത്. എന്നാൽ ജൂൺ ആദ്യവാരത്തിൽ രേഖപ്പെടുത്തിയ ഉയർന്ന നിരക്കിനെ അപേക്ഷിച്ച് വില ഇപ്പോഴും താഴെയാണ്. അന്ന് 24 കാരറ്റ് സ്വർണത്തിന്റെ ഗ്രാമിന് 538.50 ദിർഹം വരെയും 22 കാരറ്റിന് 498.50 ദിർഹം വരെയും വില ഉയർന്നിരുന്നു.

അമേരിക്കൻ സമ്പദ്‌വ്യവസ്ഥയുമായി ബന്ധപ്പെട്ട പുതിയ സാമ്പത്തിക സൂചനകളാണ് സ്വർണവില ഉയരാൻ കാരണമായതെന്നാണ് വിപണി വിദഗ്ധരുടെ വിലയിരുത്തൽ. തൊഴിൽ മേഖലയിലെ വളർച്ച പ്രതീക്ഷിച്ചതിലും മന്ദഗതിയിലായതോടെ പലിശനിരക്ക് വർധിപ്പിക്കുന്നതിൽ യുഎസ് ഫെഡറൽ റിസർവ് ജാഗ്രത പുലർത്തുമെന്ന പ്രതീക്ഷ ശക്തമായി. ഇതിന്റെ സ്വാധീനത്തിൽ രാജ്യാന്തര വിപണിയിലും സ്വർണവില ഉയർന്നതോടെയാണ് ദുബായിലെ നിരക്കിലും വർധന രേഖപ്പെടുത്തിയത്.