ജിഎസ്എൽവി എഫ്17 വിജയകരമായി വിക്ഷേപിച്ചു; എട്ട് മാസത്തിന് ശേഷം ഐഎസ്ആർഒ തിരിച്ചുവരവിന്റെ പാതയിൽ

ശ്രീഹരിക്കോട്ട: എട്ട് മാസത്തെ ഇടവേളയ്ക്ക് ശേഷം വിജയകരമായ വിക്ഷേപണവുമായി ഐഎസ്ആർഒ. ശ്രീഹരിക്കോട്ടയിലെ സതീഷ് ധവാൻ ബഹിരാകാശ കേന്ദ്രത്തിൽ നിന്ന് ജിഎസ്എൽവി എഫ്17 റോക്കറ്റ് വിജയകരമായി വിക്ഷേപിച്ചു. സെപ്റ്റംബർ 4ന് പുലർച്ചെ 2.55നായിരുന്നു വിക്ഷേപണം.

രാജ്യസുരക്ഷ, ദുരന്തനിവാരണം തുടങ്ങി വിവിധ മേഖലകളിൽ നിർണായകമായ വിവരങ്ങൾ ലഭ്യമാക്കാൻ ലക്ഷ്യമിടുന്ന അത്യാധുനിക ഭൗമനിരീക്ഷണ ഉപഗ്രഹമാണ് ദൗത്യത്തിലൂടെ ഭ്രമണപഥത്തിലെത്തിച്ചത്. EOS-5 എന്ന കോഡ് നാമമുള്ള ജിയോ ഇമേജിംഗ് സാറ്റലൈറ്റ് വൺ എ (GISAT-1A) ഭൂസ്ഥിര പരിക്രമണപഥത്തിൽ നിന്ന് ഇന്ത്യൻ ഉപഭൂഖണ്ഡത്തെ നിരന്തരം നിരീക്ഷിക്കുന്നതിനാണ് ലക്ഷ്യമിടുന്നത്.

ജിഎസ്എൽവിയുടെ 19-ാമത്തെ ദൗത്യമാണിത്. ജനുവരിയിൽ പിഎസ്എൽവി സി62 ദൗത്യം പരാജയപ്പെട്ടതിന് പിന്നാലെ ഐഎസ്ആർഒയുടെ പ്രവർത്തനങ്ങൾക്കും വിക്ഷേപണ പദ്ധതികൾക്കും ഇടവേള വന്നിരുന്നു. ഇതിന് ശേഷമുള്ള ആദ്യ വിക്ഷേപണമെന്ന നിലയിൽ ജിഎസ്എൽവി എഫ്17 ദൗത്യത്തിന്റെ വിജയം ഐഎസ്ആർഒയ്ക്ക് നിർണായകമായി.

27 മണിക്കൂറും 30 മിനിറ്റും നീണ്ട കൗണ്ട്‌ഡൗണിനാണ് ദൗത്യത്തിനായി തുടക്കം കുറിച്ചത്. സെപ്റ്റംബർ 3ന് രാത്രി 11.25ഓടെയാണ് കൗണ്ട്‌ഡൗൺ ആരംഭിച്ചത്.

2367 കിലോഗ്രാം ഭാരമുള്ള ഉപഗ്രഹത്തെ നേരിട്ട് ജിയോ ട്രാൻസ്ഫർ ഓർബിറ്റിലെത്തിക്കുന്നതിന് പകരം അതിന് അൽപം താഴെയുള്ള ഭ്രമണപഥത്തിലാണ് റോക്കറ്റിൽ നിന്ന് ഉപഗ്രഹം വേർപെടുന്നത്. തുടർന്ന് ഉപഗ്രഹത്തിലെ സ്വന്തം പ്രൊപ്പൽഷൻ സംവിധാനം ഉപയോഗിച്ച് ശേഷിക്കുന്ന ദൂരം സഞ്ചരിച്ച് ലക്ഷ്യഭ്രമണപഥത്തിലെത്തും.

2021 ഓഗസ്റ്റ് 12ന് സമാനമായ ഉപഗ്രഹത്തെ ബഹിരാകാശത്തെത്തിക്കാൻ നടത്തിയ ജിഎസ്എൽവി എഫ്10 ദൗത്യം പരാജയപ്പെട്ടിരുന്നു. ആ ദൗത്യത്തിന് പകരമായി വികസിപ്പിച്ച പുതിയ പേടകമാണ് ഇത്തവണ വിക്ഷേപിച്ചത്.

റോക്കറ്റും ഉപഗ്രഹവും നേരത്തെ തന്നെ വിക്ഷേപണത്തിനായി സജ്ജമായിരുന്നെങ്കിലും പിഎസ്എൽവി സി62 ദൗത്യത്തിലെ പരാജയത്തെ തുടർന്ന് ഐഎസ്ആർഒ സുരക്ഷാ പരിശോധനകൾക്ക് കൂടുതൽ പ്രാധാന്യം നൽകുകയായിരുന്നു. ജൂൺ അവസാനമോ ജൂലൈ ആദ്യമോ വിക്ഷേപണം നടത്താനുള്ള നീക്കമുണ്ടായിരുന്നെങ്കിലും കേന്ദ്ര അനുമതി ലഭിക്കാത്തതിനാൽ പദ്ധതി നീളുകയായിരുന്നു.

ജിഎസ്എൽവി എഫ്17ന്റെ വിജയകരമായ വിക്ഷേപണത്തോടെ തുടർച്ചയായ പരിശോധനകൾക്കും വിലയിരുത്തലുകൾക്കും ശേഷം ഐഎസ്ആർഒ വീണ്ടും സജീവമായ വിക്ഷേപണ പരമ്പരയിലേക്ക് മടങ്ങിയിരിക്കുകയാണ്.