‘വീണ്ടും അങ്ങനെ ചിരിക്കാൻ കഴിയുന്നില്ല’; പൂക്കി മുഖ്യമന്ത്രി വിളിയിൽ സതീശന്റെ പ്രതികരണം

തിരുവനന്തപുരം: ‘പൂക്കി മുഖ്യമന്ത്രി’ എന്ന വിശേഷണവുമായി ബന്ധപ്പെട്ട് മനസുതുറന്ന് മുഖ്യമന്ത്രി വി.ഡി. സതീശൻ. ദി ന്യൂ ഇന്ത്യൻ എക്സ്പ്രസിന് നൽകിയ പ്രത്യേക അഭിമുഖത്തിലാണ് ചിരിയുമായി ബന്ധപ്പെട്ട അനുഭവങ്ങളും വ്യക്തിപരമായ കാര്യങ്ങളും മുഖ്യമന്ത്രി പങ്കുവച്ചത്.

അന്ന് സംഭവിച്ചത് തികച്ചും യാദൃശ്ചികമായിരുന്നുവെന്നും, എന്നാൽ ഇപ്പോൾ അതുപോലെ ചിരിക്കാനുള്ള സാഹചര്യമില്ലെന്നും വി.ഡി. സതീശൻ പറഞ്ഞു. നിരവധി പേർ ആ ചിരി വീണ്ടും ആവർത്തിക്കാൻ ആവശ്യപ്പെടുന്നുണ്ടെങ്കിലും അത് സ്വാഭാവികമായി വരേണ്ട ഒന്നാണെന്നും അദ്ദേഹം വ്യക്തമാക്കി.

അർജന്റീന ജേഴ്സിയിലുള്ള തന്റെ ചിത്രത്തെക്കുറിച്ചും മുഖ്യമന്ത്രി പ്രതികരിച്ചു. കേരളത്തിൽ ഏത് ഫുട്ബോൾ ടീമിനെയാണ് പിന്തുണയ്ക്കുന്നതെന്ന് പറയുന്നത് പലപ്പോഴും ബുദ്ധിമുട്ടുള്ള കാര്യമാണെന്ന് അദ്ദേഹം പറഞ്ഞു. അടുത്തിടെ ഒരു വിവാഹച്ചടങ്ങിൽ ആറുവയസ്സുകാരനായ ഒരു കുട്ടി തന്നെ സമീപിച്ച് റൊണാൾഡോയുമായി ബന്ധപ്പെട്ട വിഷയം പരിഹരിക്കണമെന്ന് ആവശ്യപ്പെട്ട സംഭവവും അദ്ദേഹം പങ്കുവച്ചു. കുട്ടിയുടെ ഗൗരവമായ പ്രതികരണം എല്ലാവരിലും ചിരി പടർത്തിയെങ്കിലും, വിഷയം ഗൗരവമായി കാണണമെന്ന് കുട്ടി വീണ്ടും ഓർമ്മിപ്പിച്ചതായും മുഖ്യമന്ത്രി പറഞ്ഞു.

മുഖ്യമന്ത്രി പദവിയെക്കുറിച്ചുള്ള ചർച്ചകൾ നടന്ന ദിവസങ്ങളിലെ തന്റെ ജീവിതശൈലിയെക്കുറിച്ചും വി.ഡി. സതീശൻ സംസാരിച്ചു. ആ പത്ത് ദിവസത്തിനിടെ ഏറെ ശാന്തമായി സമയം ചെലവഴിക്കുകയും രണ്ട് പുസ്തകങ്ങൾ വായിക്കുകയും ചെയ്തതായി അദ്ദേഹം പറഞ്ഞു.

ഫാലി എസ്. നരിമാന്റെ ‘ലീഗലി സ്പീക്കിംഗ്: ഇൻസൈറ്റ്സ് ഫ്രം എ ലൈഫ് ഇൻ ലോ’ എന്ന പുസ്തകം വായിക്കാൻ തുടങ്ങിയതായും അദ്ദേഹം വ്യക്തമാക്കി. കൂടാതെ അമിതാവ് ഘോഷിന്റെ ‘ദി നട്ട്മെഗ്സ് കേഴ്‌സ്’ എന്ന പുസ്തകത്തിലെ സമുദ്രചരിത്രവുമായി ബന്ധപ്പെട്ട ഭാഗങ്ങൾ പോർട്ട് സിറ്റിയെയും മാരിടൈം മിഷനെയും കുറിച്ചുള്ള തന്റെ പ്രസംഗങ്ങളിൽ പരാമർശിച്ചതായും, അത് അമിതാവ് ഘോഷ് സോഷ്യൽ മീഡിയയിൽ പങ്കുവച്ചതായും മുഖ്യമന്ത്രി പറഞ്ഞു.