തിരുപ്പതി മാതൃകയിൽ ശബരിമല വികസനം; തീർത്ഥാടകർക്ക് കൂടുതൽ സൗകര്യങ്ങൾ ഒരുക്കുമെന്ന് മുഖ്യമന്ത്രി

കോട്ടയം: രാജ്യത്തെ മികച്ച തീർത്ഥാടന കേന്ദ്രങ്ങളിലൊന്നായി ശബരിമലയെ ഉയർത്തുകയാണ് ലക്ഷ്യമെന്ന് മുഖ്യമന്ത്രി വി.ഡി. സതീശൻ. നിലവിലെ തീർത്ഥാടന കാലം പൂർത്തിയായ ശേഷം തിരുപ്പതിയിലേതിന് സമാനമായ സൗകര്യങ്ങൾ ശബരിമലയിൽ നടപ്പാക്കുന്നതിനുള്ള നടപടികൾ ആരംഭിക്കുമെന്നും അദ്ദേഹം അറിയിച്ചു. മണ്ഡല-മകരവിളക്ക് തീർത്ഥാടനവുമായി ബന്ധപ്പെട്ട മുന്നൊരുക്കങ്ങൾ വിലയിരുത്താൻ പമ്പയിലെ ശ്രീരാമസാകേതം ഓഡിറ്റോറിയത്തിൽ ചേർന്ന വിവിധ വകുപ്പുകളുടെ യോഗത്തിന് ശേഷം മാധ്യമങ്ങളോട് സംസാരിക്കുകയായിരുന്നു മുഖ്യമന്ത്രി.

ഭക്തർക്ക് സുഗമമായ ദർശനം ഉറപ്പാക്കുന്നതിനൊപ്പം സുരക്ഷയ്ക്കും ശുചിത്വത്തിനും പ്രത്യേക പരിഗണന നൽകുമെന്ന് അദ്ദേഹം പറഞ്ഞു. പൊലീസ്, ഫയർഫോഴ്‌സ് വിഭാഗങ്ങളെ സേനാ മേധാവികളുടെ നേതൃത്വത്തിൽ വിന്യസിക്കും. അപ്പം, അരവണ തുടങ്ങിയ പ്രസാദങ്ങളുടെ ലഭ്യതയിൽ ഇത്തവണ കുറവുണ്ടാകില്ലെന്ന് ദേവസ്വം ബോർഡ് പ്രസിഡന്റ് ഉറപ്പുനൽകിയതായും മുഖ്യമന്ത്രി വ്യക്തമാക്കി. പമ്പയിൽ വസ്ത്രങ്ങൾ ഉപേക്ഷിക്കുന്നത് സൃഷ്ടിക്കുന്ന മാലിന്യപ്രശ്നം നിയന്ത്രിക്കാൻ പ്രത്യേക സംവിധാനം ഒരുക്കും. ഇടത്താവളങ്ങളിലെ സൗകര്യങ്ങളും മെച്ചപ്പെടുത്തും.

പമ്പയിലെ തിരക്ക് നിയന്ത്രിക്കുന്നതിന്റെ ഭാഗമായി നിലയ്ക്കലിൽ ആറായിരം പേർക്ക് ഒരേസമയം ഉൾക്കൊള്ളാവുന്ന ജർമൻ മാതൃകയിലുള്ള ഷെഡ് നിർമിക്കും. അടിയന്തര ചികിത്സയ്ക്കായി 22 മെഡിക്കൽ എമർജൻസി യൂണിറ്റുകളും തീർത്ഥാടകർക്കായി കെഎസ്ആർടിസിയുടെ 461 ബസുകളും സജ്ജമാക്കും. മാലിന്യങ്ങൾ സമയബന്ധിതമായി നീക്കം ചെയ്യുന്നതിനും ആശുപത്രികളിൽ മെച്ചപ്പെട്ട ചികിത്സാ സൗകര്യങ്ങൾ ഒരുക്കുന്നതിനും നിർദേശം നൽകിയിട്ടുണ്ട്.

ശബരിമലയെയും മറ്റ് ക്ഷേത്രങ്ങളെയും ബന്ധിപ്പിക്കുന്ന ക്ഷേത്ര കണക്ടിവിറ്റി സംവിധാനവും പരിഗണനയിലുണ്ട്. റോഡുകളിലെ സുരക്ഷ ഉറപ്പാക്കാൻ മോട്ടോർ വാഹന വകുപ്പ് പരിശോധന ശക്തമാക്കും. ചാലക്കയം റോഡിന്റെ നവീകരണത്തിന് 15 കോടി രൂപ ചെലവഴിക്കുന്നുണ്ടെന്നും നിർമാണം വേഗത്തിൽ പൂർത്തിയാക്കുമെന്നും മുഖ്യമന്ത്രി അറിയിച്ചു. ഈ തീർത്ഥാടന കാലത്ത് ഭക്തർക്ക് സുരക്ഷിതവും തടസ്സരഹിതവുമായ ദർശനം ഉറപ്പാക്കാൻ എല്ലാ വകുപ്പുകളും ഏകോപനത്തോടെ പ്രവർത്തിക്കുമെന്നും അദ്ദേഹം കൂട്ടിച്ചേർത്തു.