ശബരിമല തീർത്ഥാടനം; മുന്നൊരുക്കങ്ങൾ പരിശോധിക്കാൻ മുഖ്യമന്ത്രിയും ദേവസ്വം മന്ത്രിയും നാളെ സന്നിധാനത്ത്

തിരുവനന്തപുരം: ശബരിമല തീർത്ഥാടന കാലത്തിന് മുന്നോടിയായുള്ള ക്രമീകരണങ്ങൾ നേരിട്ട് വിലയിരുത്താൻ മുഖ്യമന്ത്രി വി.ഡി. സതീശനും ദേവസ്വം മന്ത്രി കെ. മുരളീധരനും നാളെ ശബരിമലയിലെത്തും. രാവിലെ ഒൻപതിന് നിലയ്ക്കലിൽ എത്തുന്ന ഇരുവരും തീർത്ഥാടകർക്ക് ആവശ്യമായ സൗകര്യങ്ങളും വിവിധ വകുപ്പുകളുടെ തയ്യാറെടുപ്പുകളും പരിശോധിക്കും.

രാവിലെ 10.30ന് പമ്പയിലെ ശ്രീരാമ സാകേത ഓഡിറ്റോറിയത്തിൽ വിവിധ സർക്കാർ വകുപ്പുകളെ പങ്കെടുപ്പിച്ച് അവലോകന, ഏകോപന യോഗം ചേരും. തീർത്ഥാടനവുമായി ബന്ധപ്പെട്ട പ്രവർത്തനങ്ങളുടെ പുരോഗതി യോഗത്തിൽ വിലയിരുത്തും. തുടർന്ന് വൈകിട്ട് നാലോടെ സന്നിധാനത്തെത്തുന്ന മുഖ്യമന്ത്രി, ദേവസ്വം മന്ത്രി എന്നിവർ അവിടെയുള്ള ഒരുക്കങ്ങൾ പരിശോധിക്കും. വൈകിട്ട് അഞ്ചിന് മുഖ്യമന്ത്രി ക്ഷേത്രദർശനം നടത്തും.

തുലാമാസ പൂജകൾക്കായി ശബരിമല ക്ഷേത്രനട നാളെ തുറക്കും. ഒക്ടോബർ 22 വരെയാണ് പൂജകൾ നടക്കുക. തീർത്ഥാടകരുടെ വരവ് വർധിക്കുന്ന സാഹചര്യത്തിൽ സുരക്ഷ, ഗതാഗതം, അടിസ്ഥാന സൗകര്യങ്ങൾ എന്നിവയുൾപ്പെടെയുള്ള ക്രമീകരണങ്ങൾ ഉറപ്പാക്കുന്നതിനാണ് അധികൃതരുടെ പരിശോധന.