റിയാദ് വിമാനത്താവളത്തിന് നേരെ ഹൂതി മിസൈലാക്രമണം: സൗദിയ ക്യാപ്റ്റൻ ഉൾപ്പെടെ 3 മരണം
സൗദി അറേബ്യയുടെ സിവില്‍ ഏവിയേഷന്‍ അതോറിറ്റിയാണ് ഇത് സ്ഥിരീകരിച്ചത്.
റിയാദ്: കിങ് ഖാലിദ് അന്താരാഷ്ട്ര വിമാനത്താവളത്തിന് നേരെ ഹൂതി വിമതർ നടത്തിയ വ്യോമാക്രമണത്തിൽ സൗദിയ എയർലൈൻസ് ക്യാപ്റ്റൻ ഉൾപ്പെടെ മൂന്ന് സൗദി പൗരന്മാർ കൊല്ലപ്പെട്ടു. വ്യാഴാഴ്ച നടന്ന രണ്ട് വ്യത്യസ്ത ആക്രമണങ്ങളിലാണ് ഇവർ കൊല്ലപ്പെട്ടതെന്ന് സൗദി അറേബ്യൻ സിവിൽ ഏവിയേഷൻ അതോറിറ്റി സ്ഥിരീകരിച്ചു. ആക്രമണത്തിൽ പരിക്കേറ്റവരെ അടിയന്തരമായി ആശുപത്രിയിലേക്ക് മാറ്റിയിട്ടുണ്ട്.
വിമാനത്താവളത്തിന്റെ അടിസ്ഥാന സൗകര്യങ്ങൾക്ക് നേരെയാണ് ആദ്യ ആക്രമണമുണ്ടായത്. തുടർന്നാണ് സൗദി എയർലൈൻസ് വിമാനത്തിന് നേരെ രണ്ടാമത്തെ ആക്രമണം നടന്നത്. സുരക്ഷ മുൻനിർത്തി വിമാനത്താവളത്തിലെ സർവീസുകൾ താൽക്കാലികമായി നിർത്തിവച്ചിരിക്കുകയാണെന്നും വ്യോമഗതാഗതം ഉടൻ തന്നെ സാധാരണ നിലയിലാകുമെന്നും അതോറിറ്റി വ്യക്തമാക്കി.
അതേസമയം, ക്രൂയിസ്-ബാലിസ്റ്റിക് മിസൈലുകൾ ഉപയോഗിച്ച് കിങ് ഖാലിദ് വ്യോമതാവളത്തിനും നജ്റാനിലെ സിവിലിയൻ വിമാനത്താവളത്തിനും നേരെ ആക്രമണം നടത്തിയതായി ഹൂതി സംഘം അവകാശപ്പെട്ടു. മേഖലയിലെ സംഘർഷ സാധ്യതയും സുരക്ഷാ ഭീഷണിയും കണക്കിലെടുത്ത് എയർ ഇന്ത്യ ഉൾപ്പെടെയുള്ള പ്രമുഖ വിമാനക്കമ്പനികൾ റിയാദിലേക്കുള്ള സർവീസുകൾ താൽക്കാലികമായി നിർത്തിവച്ചിരിക്കുകയാണ്.
Comments ()