കോഴിക്കോട് ക്ലോക്ക് റൂം തകർന്നു വീണു; മലബാറിലെ ട്രെയിൻ ഗതാഗതത്തിന് കർശന നിയന്ത്രണം

കോഴിക്കോട് റെയില്‍വേ സ്റ്റേഷനിലെ ക്ലോക്ക് റൂം കെട്ടിടം തകര്‍ന്നതിനെ തുടര്‍ന്ന് മലബാറിലെ ട്രെയിന്‍ ഗതാഗതത്തില്‍ ക്രമീകരണം ഏര്‍പ്പെടുത്തി. ഒന്ന്, രണ്ട്, മൂന്ന് ട്രാക്കുകളിലൂടെയുള്ള സര്‍വീസുകള്‍ താല്‍ക്കാലികമായി നിര്‍ത്തിവെച്ചിരിക്കുകയാണ്. ഫിറ്റ്‌നസ് സര്‍ട്ടിഫിക്കറ്റ് ലഭിച്ച ശേഷം മാത്രമേ ഈ ട്രാക്കുകള്‍ വീണ്ടും തുറക്കൂ. നിലവില്‍ നാലാമത്തെ ട്രാക്കിലൂടെ മാത്രമാണ് ട്രെയിനുകള്‍ കടത്തിവിടുന്നത്. ഈ സാഹചര്യത്തില്‍ കോഴിക്കോട് നിന്ന് തിരുവനന്തപുരത്തേക്ക് പോകേണ്ട ജനശതാബ്ദി എക്‌സ്പ്രസ് കല്ലായി റെയില്‍വേ സ്റ്റേഷനില്‍ നിന്നായിരിക്കും യാത്ര തിരിക്കുക.

12076 തിരുവനന്തപുരം സെന്‍ട്രല്‍ - കോഴിക്കോട് ജന്‍ശതാബ്ദി: ജൂലൈ 9-ന് തിരുവനന്തപുരത്തുനിന്ന് പുറപ്പെടുന്ന ഈ ട്രെയിന്‍ കോഴിക്കോടിന് പകരം കല്ലായില്‍ സര്‍വീസ് അവസാനിപ്പിക്കും. കല്ലായിക്കും കോഴിക്കോടിനും ഇടയിലുള്ള സര്‍വീസ് റദ്ദാക്കി.

16511 കെ.എസ്.ആര്‍ ബംഗളൂരു - കോഴിക്കോട് എക്‌സ്പ്രസ്: ജൂലൈ 8-ന് ബംഗളൂരുവില്‍ നിന്ന് പുറപ്പെട്ട ട്രെയിന്‍ കോഴിക്കോടിന് പകരം വെസ്റ്റ് ഹില്ലില്‍ യാത്ര അവസാനിപ്പിക്കും. വെസ്റ്റ് ഹില്ലിനും കോഴിക്കോടിനും ഇടയിലുള്ള സര്‍വീസ് റദ്ദാക്കി.

12075 കോഴിക്കോട് - തിരുവനന്തപുരം ജന്‍ശതാബ്ദി: ജൂലൈ 9-ന് ഈ ട്രെയിന്‍ കോഴിക്കോടിന് പകരം കല്ലായില്‍ നിന്നായിരിക്കും ഉച്ചയ്ക്ക് 13.50-ന് യാത്ര ആരംഭിക്കുക.

16512 കോഴിക്കോട് - കെ.എസ്.ആര്‍ ബംഗളൂരു എക്‌സ്പ്രസ്: ജൂലൈ 9-ന് കോഴിക്കോടിന് പകരം വെസ്റ്റ് ഹില്ലില്‍ നിന്നായിരിക്കും ഈ ട്രെയിന്‍ ഉച്ചയ്ക്ക് 15.40-ന് യാത്ര തിരിക്കുക.