ഇത്തവണ ഓണം കളറാകും; കെഎസ്ആർടിസി ജീവനക്കാർക്കും പെൻഷൻകാർക്കും 33.92 കോടിയുടെ ആനുകൂല്യം

ഓണം പ്രമാണിച്ച് കെഎസ്ആർടിസി ജീവനക്കാർക്കും പെൻഷൻകാർക്കും ആശ്വാസമായി സംസ്ഥാന സർക്കാർ 33.92 കോടി രൂപയുടെ പ്രത്യേക സാമ്പത്തിക പാക്കേജ് പ്രഖ്യാപിച്ചു. ഗതാഗത മന്ത്രി സി.പി. ജോൺ അറിയിച്ച ഈ പദ്ധതിയിലൂടെ സ്ഥിരം ജീവനക്കാർക്കും താൽക്കാലികക്കാർക്കും പെൻഷൻകാർക്കും ഒരുപോലെ ഓണാഘോഷ ആനുകൂല്യങ്ങൾ ലഭ്യമാകും. സാമ്പത്തിക പ്രതിസന്ധികൾക്കിടയിലും ജീവനക്കാരുടെ സേവനവും ആത്മാർഥതയും മുൻനിർത്തിയാണ് സർക്കാർ ഈ ആനുകൂല്യങ്ങൾ അനുവദിച്ചിരിക്കുന്നത്.

സ്ഥിരം ജീവനക്കാർക്ക് 10,000 രൂപ സാലറി അഡ്വാൻസും 3,000 രൂപ ഉത്സവബത്തയും അർഹരായവർക്ക് ബോണസും ലഭിക്കും. 2023-ന് ശേഷം ആദ്യമായാണ് കെഎസ്ആർടിസിയിൽ സ്ഥിരം ജീവനക്കാർക്ക് സാലറി അഡ്വാൻസ് അനുവദിക്കുന്നത്.

കൂടാതെ, 42,549 കെഎസ്ആർടിസി പെൻഷൻകാർക്ക് 1,250 രൂപ വീതം ഉത്സവബത്ത നൽകാൻ 5.32 കോടി രൂപയും വകയിരുത്തിയിട്ടുണ്ട്. 2019-ന് ശേഷം ആദ്യമായാണ് പെൻഷൻകാർക്ക് ഓണബത്ത ലഭിക്കുന്നത്. താൽക്കാലിക ജീവനക്കാർക്ക് 1,000 രൂപ വീതമാണ് ഉത്സവബത്തയായി അനുവദിച്ചിരിക്കുന്നത്. കെഎസ്ആർടിസിയുമായി ബന്ധപ്പെട്ടു പ്രവർത്തിക്കുന്ന മുഴുവൻ കുടുംബങ്ങളിലേക്കും ഓണക്കാല സഹായമെത്തിക്കാൻ ഈ തീരുമാനം സഹായിക്കും.