പ്രളയക്കെടുതിയിൽ നേപ്പാൾ; 4898 പേരെ ഇനിയും കണ്ടെത്താനായില്ല,1344 മരണം

കാഠ്മണ്ഡു: നേപ്പാളിലും ടിബറ്റിലും ദുരന്തം വിതച്ച മിന്നൽ പ്രളയത്തിന് പിന്നാലെ കാണാതായവർക്കായുള്ള തിരച്ചിൽ തുടരുന്നു. നേപ്പാളിൽ മാത്രം 4898 പേരെ ഇനിയും കണ്ടെത്താനുണ്ടെന്നാണ് ഔദ്യോഗിക കണക്ക്. വിവിധ ജലവൈദ്യുത പദ്ധതികളുടെ പരിസരങ്ങളിൽ നിന്ന് 900ഓളം പേരെ കാണാതായതായും അധികൃതർ അറിയിച്ചു. ടിബറ്റിൽ ഏകദേശം 500 പേരെക്കുറിച്ചും ഇപ്പോഴും വിവരമില്ല.

നേപ്പാളിലെ ദുരന്തത്തിൽ ഇതുവരെ 843 മൃതദേഹങ്ങളാണ് കണ്ടെത്തിയത്. മരിച്ചവരിൽ 85 കുട്ടികളുണ്ട്. കൂടാതെ 501 മൃതദേഹ ഭാഗങ്ങളും രക്ഷാപ്രവർത്തകർ കണ്ടെത്തിയിട്ടുണ്ട്. ഡിഎൻഎ പരിശോധനയ്ക്കായി സാമ്പിളുകൾ ശേഖരിച്ച ശേഷം 1030 മൃതദേഹങ്ങൾ സംസ്കരിച്ചതായി നേപ്പാൾ ദുരന്തനിവാരണ അതോറിറ്റി അറിയിച്ചു.

അതിനിടെ, ത്രിശൂലി ജലവൈദ്യുത പദ്ധതിയിലെ തുരങ്കത്തിൽ നിന്ന് രണ്ട് പേരെ ജീവനോടെ രക്ഷപ്പെടുത്തിയത് രക്ഷാപ്രവർത്തനത്തിനിടെ ആശ്വാസമായിരുന്നു. ഇതേ തുരങ്കത്തിൽ നിന്ന് ഒരു മൃതദേഹവും കണ്ടെടുത്തു. തുരങ്കങ്ങൾക്കുള്ളിൽ ഇനിയും ആരെങ്കിലും ജീവനോടെ കുടുങ്ങിക്കിടക്കുന്നുണ്ടാകാനുള്ള സാധ്യത വളരെ കുറവാണെന്നാണ് രക്ഷാപ്രവർത്തകരുടെ വിലയിരുത്തൽ.

ടിബറ്റിൽ 31 മൃതദേഹങ്ങൾ കണ്ടെത്തി

ടിബറ്റിലെ ഗിറോങ് ചെക്ക്പോസ്റ്റ് മേഖലയിൽ നിന്ന് 31 മൃതദേഹങ്ങൾ കണ്ടെത്തിയതായി ചൈനീസ് സർക്കാർ സ്ഥിരീകരിച്ചു. പ്രളയത്തിൽ തകർന്ന ഇമിഗ്രേഷൻ ഓഫീസിന് സമീപത്തുനിന്നാണ് മൃതദേഹങ്ങൾ ലഭിച്ചത്. ഇവിടെ ഇഷ ഫൗണ്ടേഷൻ വഴി എത്തിയ 80 വിദേശ ഇന്ത്യക്കാർ ഉണ്ടായിരുന്നതായും വിവരമുണ്ട്.

കണ്ടെത്തിയ മൃതദേഹങ്ങൾ ആരുടേതാണെന്ന് സ്ഥിരീകരിക്കുന്നതിനുള്ള നടപടികൾ ചൈനീസ് അധികൃതർ ആരംഭിച്ചിട്ടുണ്ട്. ടിബറ്റ് മേഖലയിൽ കുടുങ്ങിക്കിടന്നിരുന്ന എല്ലാ ഇന്ത്യക്കാരും സുരക്ഷിതമായി മടങ്ങിയതായി ഇന്ത്യൻ സർക്കാർ വൃത്തങ്ങളും അറിയിച്ചു.

മലയാളികളെക്കുറിച്ച് ആശങ്ക തുടരുന്നു

പ്രളയബാധിത മേഖലകളിൽ കാണാതായ മലയാളികളെ സംബന്ധിച്ച് പുതിയ വിവരങ്ങളൊന്നും ലഭിച്ചിട്ടില്ലെന്ന് ബന്ധുക്കൾ പറഞ്ഞു. ഓസ്ട്രേലിയൻ പൗരന്മാരായ നാല് പൊന്നാനി സ്വദേശികൾ ഉൾപ്പെടെയുള്ള മലയാളികളെക്കുറിച്ചാണ് കുടുംബങ്ങൾ ആശങ്കപ്പെടുന്നത്.

പൊന്നാനി സ്വദേശി ശ്രീധരൻ അയ്യരും കുടുംബവും അവസാനമായി ഉണ്ടായിരുന്നതായി കരുതുന്ന പ്രദേശത്ത് കഴിഞ്ഞ ദിവസവും ഹെലികോപ്റ്റർ ഉപയോഗിച്ച് തിരച്ചിൽ നടത്തിയിരുന്നു. പ്രദേശത്ത് രക്ഷാപ്രവർത്തകർ ഇന്നും തിരച്ചിൽ തുടരുന്നുണ്ടെന്ന് ബന്ധുക്കൾ അറിയിച്ചു.

നേപ്പാളിന് കൂടുതൽ സഹായവുമായി ഇന്ത്യ

ദുരന്തത്തെ തുടർന്ന് തകർന്ന ഗതാഗത സംവിധാനങ്ങൾ പുനഃസ്ഥാപിക്കുന്നതിനായി ഇന്ത്യയുടെ സഹായം തുടരുകയാണ്. കൂടുതൽ ബെയ്ലി പാലങ്ങൾ നിർമിക്കുന്നതിനുള്ള സംവിധാനങ്ങൾ ഇന്ത്യൻ സൈന്യം നേപ്പാളിൽ എത്തിക്കും. ദുരന്തബാധിത മേഖലകളിൽ രക്ഷാപ്രവർത്തനവും കാണാതായവർക്കായുള്ള തിരച്ചിലും തുടരുന്നതിനിടെയാണ് പുതിയ സഹായ സംവിധാനങ്ങൾ എത്തിക്കുന്നത്.