സൗദിയുടെ സ്വപ്നനഗരമായ ന്യൂ മുറബ്ബയിൽ 100 കോടി റിയാലിൻ്റെ അത്യാധുനിക ആശുപത്രി വരുന്നു; കരാർ ഒപ്പുവെച്ചു

സൗദി അറേബ്യയുടെ സ്വപ്ന നഗര പദ്ധതിയായ റിയാദിലെ ‘ന്യൂ മുറബ്ബ’യിൽ അത്യാധുനിക സൗകര്യങ്ങളോടെ പുതിയ ജനറൽ ആശുപത്രി നിർമിക്കുന്നു. സൗദി പബ്ലിക് ഇൻവെസ്റ്റ്മെൻറ് ഫണ്ടിന് (PIF) കീഴിലുള്ള ന്യൂ മുറബ്ബ ഡെവലപ്‌മെൻറ് കമ്പനിയും പ്രമുഖ ആരോഗ്യ സേവന ദാതാക്കളായ അൽ മാന മെഡിക്കൽ ഗ്രൂപ്പും തമ്മിലാണ് ഇത് സംബന്ധിച്ച പങ്കാളിത്ത കരാറിൽ ഒപ്പുവെച്ചത്.

ഏകദേശം 100 കോടി റിയാൽ ചെലവഴിച്ച് നിർമിക്കുന്ന ഈ പുതിയ ആശുപത്രി, പ്രദേശത്ത് വരാനിരിക്കുന്ന വൻകിട നിക്ഷേപ സംരംഭങ്ങളിലെ ആദ്യത്തേതാണ്. ലോകോത്തര നിലവാരത്തിലുള്ള സാമൂഹിക അടിസ്ഥാന സൗകര്യങ്ങൾ ഒരുക്കുന്നതിനും, തന്ത്രപ്രധാന പങ്കാളികളെ ആകർഷിക്കുന്നതിനുമുള്ള ന്യൂ മുറബ്ബയുടെ ശേഷിക്കും നിക്ഷേപകർക്ക് ഈ പദ്ധതിയിലുള്ള വലിയ വിശ്വാസത്തിനും തെളിവാണ് ഈ സംരംഭം.

അത്യാധുനിക സജ്ജീകരണങ്ങളോടെ നിർമിക്കുന്ന ഈ ആശുപത്രിയിൽ 200 കിടക്കകളാണുണ്ടാവുക. എമർജൻസി ആൻഡ് ട്രോമ കെയർ, ഫാമിലി മെഡിസിൻ, പീഡിയാട്രിക്‌സ് ആൻഡ് നിയോനേറ്റോളജി, ഓർതോപീഡിക്സ്, കാർഡിയോളജി, ന്യൂറോളജി തുടങ്ങി നിരവധി പ്രധാന ചികിത്സാ വിഭാഗങ്ങളും സേവനങ്ങളും ഇവിടെ ലഭ്യമാകും. രാജ്യത്തിൻ്റെ 'വിഷൻ 2030'ൻ്റെ ഭാഗമായുള്ള ‘ഹെൽത്ത് കെയർ ട്രാൻസ്ഫോർമേഷൻ പ്രോഗ്രാം,’ ‘ക്വാളിറ്റി ഓഫ് ലൈഫ് പ്രോഗ്രാം’ എന്നിവയുടെ ലക്ഷ്യങ്ങൾ പൂർത്തീകരിക്കുന്നതിനും, ഒരു ആധുനിക നഗരത്തിൽ ജനങ്ങൾക്ക് ഏറ്റവും മികച്ച ആരോഗ്യ സേവനങ്ങൾ ഉറപ്പാക്കുന്നതിനും ഈ പദ്ധതി വലിയ പങ്കുവഹിക്കും.