നിപ ഭീഷണി ഒഴിയുന്നില്ല; കേരളത്തിൽ രോഗബാധ വീണ്ടും ആവർത്തിച്ചേക്കാമെന്ന് മുന്നറിയിപ്പ്, ആശങ്ക പങ്കുവെച്ച് മുൻ ആരോഗ്യ സെക്രട്ടറി

കൊച്ചി: കേരളത്തിൽ നിപ വൈറസ് ബാധ വീണ്ടും റിപ്പോർട്ട് ചെയ്യപ്പെടാനുള്ള സാധ്യത തള്ളിക്കളയാനാകില്ലെന്ന് ആരോഗ്യവകുപ്പ് മുൻ സെക്രട്ടറി രാജീവ് സദാനന്ദൻ. ഉയർന്ന ജനസാന്ദ്രതയും മനുഷ്യരും വന്യമൃഗങ്ങളും തമ്മിലുള്ള ഇടപെടലുകളും രോഗവ്യാപനത്തിന് അനുകൂലമായ സാഹചര്യം സൃഷ്ടിക്കുന്നുണ്ടെന്നാണ് അദ്ദേഹത്തിന്റെ വിലയിരുത്തൽ. പഴംതീനി വവ്വാലുകളിൽ ഏകദേശം 50 ശതമാനം വരെ വൈറസ് സാന്നിധ്യമുണ്ടാകാമെന്നും അദ്ദേഹം നിരീക്ഷിച്ചു.

ദ് ന്യൂ ഇന്ത്യൻ എക്സ്പ്രസിന്റെ 'എക്സ്പ്രസ് ഡയലോഗ്സ്' അഭിമുഖത്തിലാണ് മുൻ അഡീഷനൽ ചീഫ് സെക്രട്ടറിയും ലോകബാങ്കിന്റെ പാൻഡെമിക് ഫണ്ടിന്റെ സാങ്കേതിക ഉപദേശക സമിതി അംഗവുമായ രാജീവ് സദാനന്ദൻ ഇക്കാര്യങ്ങൾ വിശദീകരിച്ചത്. നിപയുടെ പ്രധാന വാഹകരായി കണക്കാക്കപ്പെടുന്നത് Pteropus medius വിഭാഗത്തിൽപ്പെട്ട പഴംതീനി വവ്വാലുകളാണ്. ഇവയ്ക്കിടയിൽ സമ്പർക്കത്തിലൂടെ വൈറസ് പകരാം. എന്നാൽ വൈറസ് ബാധിച്ചാലും വവ്വാലുകൾ ചത്തുപോകണമെന്നില്ല. രോഗാണുവിനെ ശരീരത്തിൽ വഹിച്ചുകൊണ്ട് മറ്റിടങ്ങളിലേക്ക് വ്യാപിപ്പിക്കാൻ ഇവയ്ക്ക് കഴിയും.

നിപയുടെ ആദ്യകാല പഠനങ്ങളിൽ പഴംതീനി വവ്വാലുകളിൽ ഏകദേശം 22 ശതമാനം വരെ വൈറസ് ബാധ കണ്ടെത്തിയിരുന്നു. അതിനാൽ ഇവയുടെ ആവാസവ്യവസ്ഥ നിലനിൽക്കുന്നിടത്തോളം രോഗസാധ്യതയും തുടരുമെന്നാണ് അദ്ദേഹത്തിന്റെ വിലയിരുത്തൽ. ബംഗ്ലാദേശിൽ എല്ലാ വർഷവും നിപ കേസുകൾ റിപ്പോർട്ട് ചെയ്യപ്പെടുന്ന സാഹചര്യവും അദ്ദേഹം ചൂണ്ടിക്കാട്ടി.

കോഴിക്കോട്ടുനിന്നാണ് കേരളത്തിൽ കൂടുതൽ നിപ കേസുകൾ പുറത്തുവരുന്നതെങ്കിലും രോഗം സംസ്ഥാനത്തെ മറ്റിടങ്ങളിലും ഉണ്ടാകാമെന്ന് രാജീവ് സദാനന്ദൻ പറഞ്ഞു. 2019ൽ ഇടുക്കിയിലും നിപ സ്ഥിരീകരിച്ചിരുന്നതാണ് ഇതിന് ഉദാഹരണമായി അദ്ദേഹം ചൂണ്ടിക്കാട്ടിയത്. കേസുകൾ സംബന്ധിച്ച വിവരങ്ങൾ കേരളം കൂടുതൽ സുതാര്യമായി പുറത്തുവിടുന്നതും ഇവിടെ റിപ്പോർട്ടുകളുടെ എണ്ണം കൂടുതലായി കാണപ്പെടാൻ കാരണമാകാമെന്നും അദ്ദേഹം അഭിപ്രായപ്പെട്ടു.

2018ലെ നിപ വ്യാപനകാലത്തെ അനുഭവങ്ങളും അഭിമുഖത്തിൽ അദ്ദേഹം പങ്കുവച്ചു. രോഗവ്യാപനത്തിന്റെ വ്യാപ്തി തിരിച്ചറിയാൻ അന്ന് ഏകദേശം 18 ദിവസത്തെ കാലതാമസമുണ്ടായി. മരണനിരക്ക് 70 മുതൽ 100 ശതമാനം വരെയാകാമെന്ന ആശങ്ക നിലനിന്നിരുന്നതിനാൽ മലബാർ മേഖലയിൽ 254 കേസുകൾ വരെ ഉണ്ടായേക്കാമെന്ന് കണക്കുകൂട്ടിയിരുന്നു. മുന്നൊരുക്കത്തിന്റെ ഭാഗമായി 300 പേരെ ചികിത്സിക്കാനുള്ള സൗകര്യം ഒരുക്കിയെങ്കിലും പിപിഇ കിറ്റുകളുടെ കുറവ് ഉൾപ്പെടെയുള്ള പ്രതിസന്ധികൾ നേരിടേണ്ടിവന്നു.

ലോകാരോഗ്യ സംഘടനയുടെ സഹായത്തോടെ ഗവേഷണ സമിതി രൂപീകരിച്ച് രോഗവ്യാപനത്തെക്കുറിച്ച് പഠനം നടത്തിയതായും അദ്ദേഹം പറഞ്ഞു. അന്നത്തെ അടിയന്തര സാഹചര്യത്തിൽ നിലവിലുള്ള ചട്ടങ്ങൾക്കപ്പുറമുള്ള ചില നടപടികൾ സ്വീകരിക്കേണ്ടിവന്നുവെന്നും രാജീവ് സദാനന്ദൻ വ്യക്തമാക്കി.