ലൈംഗിക ചൂഷണത്തിനെതിരെ കുട്ടികൾക്ക് ബോധവൽക്കരണം; ‘സുരക്ഷിത ബാല്യം’ ക്യാമ്പയിൻ

തൃശ്ശൂർ: കുട്ടികൾക്ക് നേരെയുള്ള ലൈംഗികാതിക്രമങ്ങൾ പ്രതിരോധിക്കുന്നതിനും ഇത്തരം സംഭവങ്ങളിൽ നിയമം നൽകുന്ന സംരക്ഷണത്തെക്കുറിച്ച് വിദ്യാർത്ഥികളെ ബോധവാന്മാരാക്കുന്നതിനുമായി ദേശീയ നിയമസേവന അതോറിറ്റിയുടെ ‘സുരക്ഷിത ബാല്യം’ ക്യാമ്പയിൻ. രാജ്യത്തെ സ്കൂളുകൾ കേന്ദ്രീകരിച്ച് നടത്തുന്ന പരിപാടിയിലൂടെ കുട്ടികൾക്ക് അവരുടെ അവകാശങ്ങളെക്കുറിച്ചും സുരക്ഷ ഉറപ്പാക്കാനുള്ള മാർഗങ്ങളെക്കുറിച്ചും അറിവ് നൽകുകയാണ് ലക്ഷ്യമിടുന്നത്.

‘അവബോധം, സുരക്ഷ, സംരക്ഷണം — ഓരോ കുട്ടിയുടെയും അവകാശം’ എന്ന ആശയമാണ് ക്യാമ്പയിൻ ഉയർത്തിപ്പിടിക്കുന്നത്. കുട്ടികളുടെ സുരക്ഷ ഉറപ്പാക്കുന്നതിൽ സമൂഹത്തിലെ ഓരോരുത്തർക്കും പങ്കുണ്ടെന്ന സന്ദേശവും ഇതിലൂടെ നൽകുന്നു. കുട്ടികൾക്കെതിരായ ലൈംഗികാതിക്രമങ്ങൾ തടയുന്നതിനുള്ള പോക്സോ നിയമത്തിലെ വ്യവസ്ഥകൾ, നിയമപരമായ അവകാശങ്ങൾ, സംരക്ഷണം ലഭിക്കുന്നതിനുള്ള മാർഗങ്ങൾ എന്നിവ വിദ്യാർത്ഥികൾക്ക് വിശദീകരിക്കും.

അനുചിതമായ പെരുമാറ്റങ്ങൾ തിരിച്ചറിയാനും സുരക്ഷിതമായ സാഹചര്യങ്ങളും അപകടസാധ്യതയുള്ള സാഹചര്യങ്ങളും വേർതിരിച്ചറിയാനും കുട്ടികളെ സഹായിക്കുന്നതാണ് പരിപാടിയുടെ പ്രധാന ഭാഗം. അതിക്രമങ്ങൾ നേരിടുകയോ സംശയകരമായ സാഹചര്യങ്ങൾ ഉണ്ടാകുകയോ ചെയ്താൽ ആരുടെ സഹായം തേടണം, വിശ്വസ്തരായ മുതിർന്നവരോട് എങ്ങനെ കാര്യങ്ങൾ പങ്കുവയ്ക്കണം, ബന്ധപ്പെട്ട അധികൃതരെ വിവരം അറിയിക്കേണ്ടത് എങ്ങനെ തുടങ്ങിയ കാര്യങ്ങളും പഠിപ്പിക്കും. ഡിജിറ്റൽ ഇടങ്ങളിൽ കുട്ടികൾ നേരിടാനിടയുള്ള ചൂഷണങ്ങൾ, ഓൺലൈൻ സ്വകാര്യത, സുരക്ഷിതമായ ഇന്റർനെറ്റ് ഉപയോഗം എന്നിവയും ബോധവൽക്കരണത്തിൽ ഉൾപ്പെടും.

പോക്സോ നിയമപ്രകാരം 18 വയസ്സിന് താഴെയുള്ള കുട്ടികൾക്ക് ലഭിക്കുന്ന സംരക്ഷണത്തെക്കുറിച്ച് ക്യാമ്പയിനിലൂടെ വിശദീകരിക്കും. അതിക്രമങ്ങളുമായി ബന്ധപ്പെട്ട കേസുകളിൽ കുട്ടികൾക്ക് അനുയോജ്യമായ രീതിയിൽ റിപ്പോർട്ടിങ്, അന്വേഷണം, വിചാരണ എന്നിവ നടത്തേണ്ടതിന്റെ ആവശ്യകതയും ഇരകളുടെ വ്യക്തിവിവരങ്ങൾ രഹസ്യമായി സൂക്ഷിക്കേണ്ടതിന്റെ പ്രാധാന്യവും പരിചയപ്പെടുത്തും. ആവശ്യമായവർക്ക് സൗജന്യ നിയമസഹായം ലഭ്യമാക്കുന്ന സംവിധാനങ്ങളെക്കുറിച്ചും വിദ്യാർത്ഥികൾക്ക് അറിവ് നൽകും.

കുട്ടികൾക്ക് ഭയമില്ലാതെ പഠിക്കാനും അവരുടെ സുരക്ഷയെക്കുറിച്ച് തുറന്നുപറയാനും കഴിയുന്ന സാഹചര്യം സൃഷ്ടിക്കുക എന്നതാണ് സ്കൂൾ തലത്തിൽ നടത്തുന്ന ക്യാമ്പയിനിന്റെ ലക്ഷ്യം. കുട്ടികളുടെ അവകാശങ്ങൾ സംരക്ഷിക്കാൻ രക്ഷിതാക്കൾ, അധ്യാപകർ, നിയമസംവിധാനങ്ങൾ, പൊതുസമൂഹം എന്നിവരുടെ കൂട്ടായ ഇടപെടൽ അനിവാര്യമാണെന്നും പരിപാടി ഓർമിപ്പിക്കുന്നു.

ക്യാമ്പയിനിന്റെ ഭാഗമായി തൃശ്ശൂർ ജില്ലാ നിയമസേവന അതോറിറ്റി സംഘടിപ്പിക്കുന്ന പരിപാടി ഒക്ടോബർ 26 തിങ്കളാഴ്ച രാവിലെ ഒമ്പതിന് തൃശ്ശൂർ ഗവ. മോഡൽ ഗേൾസ് ഹയർ സെക്കൻഡറി സ്കൂളിൽ നടക്കും. പ്രിൻസിപ്പൽ ജില്ലാ ആൻഡ് സെഷൻസ് ജഡ്ജി ശശികുമാർ പി.എസ്. ഉദ്ഘാടനം നിർവഹിക്കും. ജില്ലാ നിയമസേവന അതോറിറ്റി സെക്രട്ടറിയും സിവിൽ ജഡ്ജിയുമായ വിൻസി ടി.വി. അധ്യക്ഷയാകും.

സ്കൂൾ പ്രധാനാധ്യാപിക ഡോ. ബിന്ദു കെ.പി. സ്വാഗതം ആശംസിക്കും. ജില്ലാ നിയമസേവന അതോറിറ്റി പാനൽ അഭിഭാഷക അഡ്വ. റീന ജോൺ എൻ. വിദ്യാർത്ഥികൾക്കായി ക്ലാസ് നടത്തും. യു.പി. വിഭാഗം സീനിയർ അസിസ്റ്റന്റ് ജിൻസി ഗംഗൻ നന്ദി അറിയിക്കും.