പ്രതിസന്ധി മറികടന്ന് സൗദി: പേർഷ്യൻ ഗൾഫ് വഴി കയറ്റുമതി കൂട്ടി; എണ്ണവില കുറഞ്ഞു

ഹൂതികളുടെ ഡ്രോൺ ആക്രമണത്തെ തുടർന്ന് ചെങ്കടൽ തീരത്തെ യാൻബു ടെർമിനലിലേക്കുള്ള പ്രധാന ഈസ്റ്റ്-വെസ്റ്റ് എണ്ണ പൈപ്പ്‌ലൈനിന്റെ പ്രവർത്തനം സെപ്റ്റംബർ 13-ന് തടസ്സപ്പെട്ടിരുന്നു. എന്നാൽ, ഈ പ്രതിസന്ധിയെ മറികടക്കാൻ പേർഷ്യൻ ഗൾഫ് ടെർമിനലുകൾ വഴിയുള്ള ക്രൂഡ് ഓയിൽ കയറ്റുമതി സൗദി അറേബ്യ ക്രമാതീതമായി ഉയർത്തിയിരിക്കുകയാണ്. കിഴക്കൻ പ്രവിശ്യയിലെ റാസ് തനൂറ തുറമുഖത്തിന് സമീപം നിലയുറപ്പിച്ച ഏഴ് സൂപ്പർ ടാങ്കറുകളിലായി ഞായറാഴ്ച മാത്രം ഏകദേശം 1.4 കോടി ബാരൽ ക്രൂഡ് ഓയിലാണ് സൗദി കയറ്റി അയച്ചതെന്ന് റോയിട്ടേഴ്സ് റിപ്പോർട്ട് ചെയ്തു. ഇതിന്റെ ഉപഗ്രഹ ചിത്രങ്ങളും പുറത്തുവന്നിട്ടുണ്ട്.

മേഖലയിൽ ഊർജ്ജ ഗതാഗത പ്രതിസന്ധി തുടരുമ്പോഴും ബദൽ മാർഗ്ഗങ്ങളിലൂടെ കയറ്റുമതി തടസ്സമില്ലാതെ പുനഃസ്ഥാപിക്കാൻ സൗദിക്ക് സാധിക്കുന്നത് അന്താരാഷ്ട്ര എണ്ണവിപണിക്ക് വലിയ ആശ്വാസമാകുകയാണ്. ഇതിന്റെ ഫലമായി രാജ്യാന്തര വിപണിയിൽ എണ്ണവില കുറയുകയും തിങ്കളാഴ്ച ബ്രെന്റ് ക്രൂഡ് ഓയിൽ വില ബാരലിന് 100 ഡോളറിന് താഴെയെത്തുകയും ചെയ്തു. ചെങ്കടൽ വഴിയുള്ള കയറ്റുമതി മുടങ്ങിയിട്ടും ഗൾഫ് ടെർമിനലുകളിലേക്ക് വിജയകരമായി എണ്ണ നീക്കം മാറ്റാൻ സാധിച്ചത് ആഗോള വിപണിയിലേക്ക് സൗദി ക്രൂഡ് ഓയിൽ എത്തിക്കുന്നതിൽ നിർണായക വഴിത്തിരിവായിട്ടുണ്ട്.