പാനുണ്ടയിൽ നാടിനെ കണ്ണീരിലാഴ്ത്തി ദുരന്തം: ശുചീകരണത്തിനിടയിൽ കുളത്തിന്റെ പടിക്കെട്ടിൽ വീണ് ആറുവയസ്സുകാരി മരിച്ചു

കണ്ണൂർ: കണ്ണൂർ പാനുണ്ടയിൽ പൊതുശുചീകരണ പ്രവൃത്തിക്കിടയിൽ കുളത്തിന്റെ പടിക്കെട്ടിൽ വീണ് ആറുവയസ്സുകാരിക്ക് ദാരുണാന്ത്യം. രണ്ടാം ക്ലാസ് വിദ്യാർത്ഥിനിയായ മിർസയാണ് മരിച്ചത്. ഇന്ന് (ഞായറാഴ്ച) രാവിലെ ഏഴുമണിയോടെയായിരുന്നു നാടിനെ കണ്ണീരിലാഴ്ത്തിയ ഈ ദുരന്തം.

പതിവുപോലെ നാട്ടുകാർ ഒന്നടങ്കം ശുചീകരണ പ്രവൃത്തികളിൽ പങ്കാളികളായിരിക്കുന്നതിനിടയിലാണ് സംഭവം. കുളത്തിന് സമീപത്തുകൂടി നടന്നുപോകുന്നതിനിടെ മിർസയുടെ ഹെയർബാൻഡ് കുളത്തിന്റെ പടിക്കെട്ടിലേക്ക് വീഴുകയായിരുന്നു. ഇത് എടുക്കാൻ ശ്രമിക്കുന്നതിനിടയിൽ കാൽവഴുതി വീണ് കുട്ടിയുടെ തല പടിക്കെട്ടിൽ ശക്തമായി ഇടിക്കുകയായിരുന്നു.

കുറച്ചുസമയത്തിന് ശേഷം മറ്റൊരു കുട്ടിയാണ് മിർസ പടിക്കെട്ടിൽ വീണുകിടക്കുന്നത് കാണുന്നത്. ഉടൻതന്നെ കൂത്തുപറമ്പിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. തുടർന്ന് മൃതദേഹം പോസ്റ്റ്‌മോർട്ടത്തിനായി തലശ്ശേരി ജനറൽ ആശുപത്രിയിലേക്ക് മാറ്റി. നാടിനെ മുഴുവൻ ദുഃഖത്തിലാഴ്ത്തിയിരിക്കുകയാണ് ഈ അപ്രതീക്ഷിത വിയോഗം.