'പത്മജയെ പാർട്ടിയിലെത്തിച്ചതിൽ പങ്കില്ല, രാജിയെ എതിർക്കാനുമില്ല, ഞാൻ ഈ വിഷയത്തിന്റെ ഭാഗമല്ല'; ഒഴിഞ്ഞുമാറി സുരേഷ് ഗോപി

ബിജെപിയുമായുള്ള ബന്ധം അവസാനിപ്പിച്ച കാര്യം പത്മജ വേണുഗോപാല്‍ തന്നെയാണ് ഇന്ന് മാധ്യമങ്ങളിലൂടെ അറിയിച്ചത്. രാജിക്കത്ത് ഇമെയില്‍ വഴി നേതൃത്വത്തിന് അയച്ചതായും അവര്‍ വ്യക്തമാക്കി

'പത്മജയെ പാർട്ടിയിലെത്തിച്ചതിൽ പങ്കില്ല, രാജിയെ എതിർക്കാനുമില്ല, ഞാൻ ഈ വിഷയത്തിന്റെ ഭാഗമല്ല'; ഒഴിഞ്ഞുമാറി സുരേഷ് ഗോപി

തൃശൂര്‍: പത്മജ വേണുഗോപാല്‍ ബിജെപിയില്‍നിന്ന് രാജിവെച്ച സംഭവത്തില്‍ പ്രതികരിക്കേണ്ടത് പാര്‍ട്ടിയുടെ സംസ്ഥാന നേതൃത്വമാണെന്ന് കേന്ദ്രമന്ത്രി സുരേഷ് ഗോപി. പത്മജയെ ബിജെപിയിലേക്ക് കൊണ്ടുവരുന്നതിലോ അവരുടെ രാജിയെ എതിര്‍ക്കുന്നതിലോ തനിക്ക് പങ്കില്ലെന്നും അദ്ദേഹം വ്യക്തമാക്കി. വിഷയത്തില്‍ മാധ്യമങ്ങളോട് പ്രതികരിക്കവെയാണ് സുരേഷ് ഗോപി നിലപാട് അറിയിച്ചത്.

'ഇത്തരം കാര്യങ്ങള്‍ എന്നോടല്ല ചോദിക്കേണ്ടത്. ബിജെപി സംസ്ഥാന ഘടകത്തോടാണ് ചോദിക്കേണ്ടത്. പത്മജയെ പാര്‍ട്ടിയിലേക്ക് കൊണ്ടുവരുന്നതില്‍ ഞാന്‍ ഇടപെട്ടിട്ടില്ല. അവര്‍ പുറത്തുപോകുന്നതിനെ എതിര്‍ക്കാനും എനിക്ക് അവകാശമില്ല. ഇതുമായി ബന്ധപ്പെട്ട കാര്യങ്ങള്‍ സംസ്ഥാന നേതാക്കളാണ് വിശദീകരിക്കേണ്ടത്' എന്നായിരുന്നു സുരേഷ് ഗോപിയുടെ പ്രതികരണം.

ബിജെപിയുമായുള്ള ബന്ധം അവസാനിപ്പിച്ച കാര്യം പത്മജ വേണുഗോപാല്‍ തന്നെയാണ് ഇന്ന് മാധ്യമങ്ങളിലൂടെ അറിയിച്ചത്. രാജിക്കത്ത് ഇമെയില്‍ വഴി നേതൃത്വത്തിന് അയച്ചതായും അവര്‍ വ്യക്തമാക്കി. സ്ഥാനമാനങ്ങള്‍ ലഭിക്കാത്തതല്ല പാര്‍ട്ടി വിടാനുള്ള കാരണമെന്നും ബിജെപിയുടെ രാഷ്ട്രീയ നിലപാടുകളും ആശയങ്ങളും കൃത്യമായി മനസ്സിലാക്കാതെയാണ് പാര്‍ട്ടിയില്‍ ചേര്‍ന്നതെന്നും പത്മജ പറഞ്ഞു. അത്തരമൊരു തീരുമാനം എടുത്തത് തെറ്റായിപ്പോയെന്നും അവര്‍ തുറന്നുപറഞ്ഞു.

രാജിവെക്കാനുള്ള തീരുമാനം ആദ്യം അറിയിച്ചത് സഹോദരന്‍ കെ. മുരളീധരനെയാണെന്നും പത്മജ വെളിപ്പെടുത്തി. സഹോദരനെ തിരിച്ചുകിട്ടിയതാണ് ഇപ്പോള്‍ ഏറ്റവും വലിയ സന്തോഷമെന്നും അതിനപ്പുറം മറ്റൊന്നും ആഗ്രഹിക്കുന്നില്ലെന്നും അവര്‍ പറഞ്ഞു. കോണ്‍ഗ്രസില്‍ പദവി ലഭിക്കുമെന്ന പ്രതീക്ഷയിലല്ല ബിജെപി വിട്ടത്. തെറ്റ് സംഭവിച്ചാല്‍ അത് തുറന്നുപറയണമെന്ന പാഠം പിതാവ് കെ. കരുണാകരനില്‍നിന്നാണ് ലഭിച്ചതെന്നും പത്മജ കൂട്ടിച്ചേര്‍ത്തു.

പ്രധാനമന്ത്രി നരേന്ദ്രമോദിയെയോ കേന്ദ്ര ആഭ്യന്തരമന്ത്രി അമിത് ഷായെയോ ജീവിതത്തില്‍ ഒരിക്കല്‍പോലും നേരില്‍ കണ്ടിട്ടില്ലെന്നും ബിജെപി തനിക്ക് പ്രത്യേക വാഗ്ദാനങ്ങളൊന്നും നല്‍കിയിരുന്നില്ലെന്നും അവര്‍ പറഞ്ഞു. പാര്‍ട്ടിയില്‍ നിന്ന് താന്‍ ഒന്നും ആവശ്യപ്പെട്ടിട്ടുമില്ല. കോണ്‍ഗ്രസിലേക്ക് മടങ്ങുന്ന കാര്യത്തില്‍ ഇതുവരെ തീരുമാനമെടുത്തിട്ടില്ലെന്നും യുഡിഎഫ് അധികാരത്തിലെത്തുമെന്ന് നേരത്തെ തന്നെ പ്രതീക്ഷിച്ചിരുന്നുവെന്നും പത്മജ വ്യക്തമാക്കി. ആരുമായും വ്യക്തിപരമായ തര്‍ക്കമില്ലെന്നും അവര്‍ പറഞ്ഞു.