ഡിസംബറിൽ തുടർച്ചയായി അഞ്ച് ദിവസം അവധി; യുഎഇ സർക്കാർ ജീവനക്കാർക്ക് സന്തോഷവാർത്ത

അബുദാബി: യുഎഇയുടെ 55-ാമത് ദേശീയദിനമായ 'ഈദ് അൽ ഇത്തിഹാദ്' ആഘോഷങ്ങളുടെ ഭാഗമായി ഫെഡറൽ സർക്കാർ ജീവനക്കാർക്ക് മൂന്ന് ദിവസത്തെ ഔദ്യോഗിക അവധി പ്രഖ്യാപിച്ചു. വാരാന്ത്യ അവധികൾ കൂടി ചേരുന്നതോടെ ജീവനക്കാർക്ക് തുടർച്ചയായി അഞ്ച് ദിവസം വിശ്രമിക്കാനുള്ള അവസരമാണ് ലഭിക്കുക.

ഡിസംബർ 2 ബുധനാഴ്ച മുതൽ ഡിസംബർ 4 വെള്ളിയാഴ്ച വരെയാണ് സർക്കാർ സ്ഥാപനങ്ങൾക്ക് അവധി. തുടർന്ന് ശനി, ഞായർ ദിവസങ്ങളിലെ പതിവ് വാരാന്ത്യ അവധികൾ കൂടി ലഭിക്കുന്നതിനാൽ ഡിസംബർ 7 തിങ്കളാഴ്ചയായിരിക്കും ഓഫീസുകൾ വീണ്ടും പ്രവർത്തനം ആരംഭിക്കുക. യുഎഇ ഗവൺമെന്റ് മീഡിയ ഓഫീസാണ് അവധി സംബന്ധിച്ച അറിയിപ്പ് പുറത്തുവിട്ടത്.

1971 ഡിസംബർ 2-ന് രാജ്യത്തിന്റെ രൂപീകരണം നടന്നതിന്റെ സ്മരണ പുതുക്കിയാണ് എല്ലാ വർഷവും ദേശീയദിനം ആഘോഷിക്കുന്നത്. രാജ്യത്തിന്റെ ഐക്യവും രൂപീകരണത്തിന്റെ ചരിത്രവും ഓർമിക്കുന്നതിനായി വിവിധ പരിപാടികളാണ് ഈദ് അൽ ഇത്തിഹാദ് ദിനത്തിൽ സംഘടിപ്പിക്കുന്നത്.

2026-ലെ ദേശീയദിനത്തോടനുബന്ധിച്ച് പ്രഖ്യാപിച്ച അവധി ഫെഡറൽ സർക്കാർ ജീവനക്കാർക്കാണ് ബാധകമാകുന്നത്. ഡിസംബർ 7 മുതൽ സർക്കാർ സ്ഥാപനങ്ങളുടെ ഔദ്യോഗിക പ്രവർത്തനങ്ങൾ സാധാരണ നിലയിൽ പുനരാരംഭിക്കും.