യുദ്ധഭീതി വീണ്ടും വിപണിയിൽ; സെൻസെക്സ് ഇടിഞ്ഞു, രൂപയും ദുർബലമായി

മുംബൈ: അമേരിക്ക–ഇറാൻ സംഘർഷം വീണ്ടും രൂക്ഷമായതോടെ ഇന്ത്യൻ ഓഹരി വിപണിയിൽ കനത്ത സമ്മർദം. ആഗോള വിപണികളിലെ ആശങ്കകൾക്കൊപ്പം എണ്ണവില ഉയർന്നതും നിക്ഷേപകരെ സ്വാധീനിച്ചതോടെ വ്യാപാരത്തിന്റെ തുടക്കത്തിൽ തന്നെ പ്രധാന സൂചികകൾ ഇടിവ് രേഖപ്പെടുത്തി.

ബുധനാഴ്ച വ്യാപാരം ആരംഭിച്ചപ്പോൾ സെൻസെക്സ് 500 പോയിന്റിലേറെ താഴ്ന്നു. നിഫ്റ്റി 24,000 നിലവാരത്തിന് തൊട്ടുമുകളിലാണ് വ്യാപാരം നടത്തിയത്. ഹോർമുസ് കടലിടുക്കിന്റെ നിയന്ത്രണവുമായി ബന്ധപ്പെട്ട് അമേരിക്കയും ഇറാനും തമ്മിലുള്ള തർക്കം ശക്തമായതാണ് വിപണിയിലെ ആശങ്കയ്ക്ക് പ്രധാന കാരണം.

ലോകത്തെ പ്രധാന എണ്ണ ഗതാഗത പാതകളിലൊന്നായ ഹോർമുസ് കടലിടുക്കിലെ സാഹചര്യം അനിശ്ചിതത്വത്തിലായതോടെ ക്രൂഡ് ഓയിൽ വില വീണ്ടും ഉയർന്നു. കഴിഞ്ഞ രണ്ട് ദിവസത്തിനിടെ എണ്ണവിലയിൽ 11 ശതമാനം വർധനയാണ് രേഖപ്പെടുത്തിയത്. ഇതാണ് ഓഹരി വിപണിയിൽ നേരിട്ട് പ്രതിഫലിക്കുന്നത്.

ബാങ്കിങ്, ഐടി മേഖലകളിലെ പ്രമുഖ ഓഹരികൾക്കാണ് പ്രധാനമായും തിരിച്ചടി നേരിട്ടത്. എച്ച്ഡിഎഫ്സി ബാങ്ക്, എച്ച്സിഎൽ ടെക്, ഇൻഫോസിസ്, ബജാജ് ഫിനാൻസ് തുടങ്ങിയ ഓഹരികൾ നഷ്ടത്തിലാണ് വ്യാപാരം നടത്തിയത്.

അതേസമയം, ഡോളറിനെതിരെ രൂപയുടെ മൂല്യത്തിലും ഇടിവുണ്ടായി. വ്യാപാരത്തിന്റെ തുടക്കത്തിൽ 48 പൈസയുടെ നഷ്ടത്തോടെ രൂപ 96 നിലവാരം കടന്നു. എണ്ണവിലയിലെ വർധനയും ഡോളറിന്റെ ശക്തിപ്പെടലുമാണ് രൂപയുടെ മൂല്യത്തകർച്ചയ്ക്ക് കാരണമായത്. കഴിഞ്ഞ ദിവസം രൂപയ്ക്ക് 30 പൈസയുടെ നഷ്ടമുണ്ടായിരുന്നു.

ഹോർമുസ് കടലിടുക്കിലെ സംഘർഷാവസ്ഥ എത്രത്തോളം നീളുമെന്നതിനെ ആശ്രയിച്ചാകും വരും ദിവസങ്ങളിലെ വിപണി നീക്കം എന്നാണ് വിദഗ്ധരുടെ വിലയിരുത്തൽ.